«Qazposhta» klıentteri ınternet arqyly tólem jasaı alatyn bolady
ASTANA. 17 tamyz. QazAqparat -«Qazposhta» klıentteri ınternet arqyly tólem jasaı alatyn bolady. Olar úshin mundaı múmkinshilikke kompanııa Visa International halyqaralyq tólem júıesiniń negizgi múshesi mártebesin alǵannan keıingi sertıfıkattaý protsedýrasy aıaqtalǵannan soń ıe bolady, dep habarlady www.halyk-ipo.kz saıty.
«Biz sertıfıkattaý protsesin aǵymdaǵy jyldyń sońyna deıin aıaqtaýǵa úmit artyp otyrmyz. Nátıjesinde bizdiń klıentter SMS jáne ınternet-bankıng arqyly aqshany kartadan kartaǵa, sonymen qatar túrli esepshottar men depozıtterge aýdara alatyn bolady», - dep habarlady www.halyk-ipo.kz portalyna «Qazposhta» AQ kartochkalyq ónimder departamenti dırektorynyń mindetin atqarýshy Manarbek Ábenov.
Osylaısha, kompanııa máselen, taýarǵa tapsyrys berip, tólem jasaýdan bastap ony klıentke jetkizip berýge deıingi elektrondy kommertsııa qyzmetteriniń keshenin usyna alatyn bolady. Oǵan qosa, kompanııa klıentterine úıde otyryp ne bolmasa keńseden qundy qaǵazdardy qosa alǵanda taýarlar men qyzmetterdi satyp alý úshin esepshottan aqsha aýdarý múmkindigi beriledi.
«Visa halyqaralyq tólem júıesiniń negizgi qatysýshysy mártebesin ıelenýmen qatar «Qazposhta» saýda ekvaırıngi men elektrondy kommertsııaǵa da lıtsenzııa aldy. Bul taıaý aralyqta «Qazposhta» shyǵarǵan Visa kartasyn ıelenýshiler úshin qyzmetter spektrin aıtarlyqtaı ulǵaıtýǵa múmkindik beredi», - dep málim etti «Qazposhta» AQ Basqarma tóraǵasynyń orynbasary Ermek Pirimbetov. Onyń bul sózi atalǵan kompanııa búgin taratqan baspasóz habarlamasynda keltirilgen.
