«Qazposhta» Qazaqstan boıynsha kúnine 30 myńnan astam sálemdeme jetkizedi
ASTANA. QazAqparat - «Qazposhta» Qazaqstan boıynsha kúnine 30 myńnan astam sálemdeme jetkizedi. Bul týraly búgin elordada ótken baspasóz máslıhatynda «Qazposhta» AQ-nyń bıznes jónindegi basqarýshy dırektory Azat Mashabaev aıtty, dep habarlaıdy QazAqparat.
Onyń aıtýynsha, transformatsııa qolǵa alynǵannan beri «Qazposhta» AQ aıtarlyqtaı ózgerdi. Kompanııa sálemdemelerdi berý úshin 130 pochtomatty jáne 47 sýpermarketti ashty, agenttik bıznesti iske qosty. Búginde Qazposhta bólimsheleri arqyly 1 myńnan astam nesıe rásimdeldi. Poshtanyń kólemi de qarqyndy túrde artyp keledi. Qazaqstan boıynsha kúnine 30 myńnan astam sálemdeme jetkiziledi.
«Kópshilik jumystaǵy erekshelikter jaıly bile bermeıdi. Álem boıynsha jetkizilimder tirkeletin jáne tirkelmeıtin bolady. Tirkeletin degenimiz - sálemdemeni jetkizýdiń barlyq kezeńinde trekıng arqyly kórý múmkindigi. Al tirkelmeıtin sálemdemeler salmaqpen eseptelinedi jáne qadaǵalanbaıdy. Bul jóneltilimniń arzan túri jáne bizdiń jalpy kólemniń 70 paıyzyn quraıdy. Sondyqtan barlyq jóneltilimderdi tirkeý sheshimin qabyldadyq»,- dedi ol.
Azat Mashabaevtyń atap ótýinshe, Qazposhta kórsetiletin qyzmet sapasyn jaqsartý maqsatynda qyzmetkerlerge uqypty óndiristiń qaǵıdalaryn meńgertip, suryptaý barysyn avtomattandyrdy. Onyń esebinen suryptaý ortalyǵynyń ótkizý qabileti 30 paıyzǵa ulǵaıtyldy, suryptaý kezindegi qatelikter 99 paıyzǵa joıyldy jáne Qazaqstan boıynsha jetkizýdiń ortasha merzimi 11-den 6 kúnge deıin qysqardy.
