Qazposhta kassırleri ataýly áleýmettik kómekke bólingen qarajatty jymqyrǵan – Túrkistan
«Osy aptada Pavlodar oblysynyń sybaılas jemqorlyqqa qarsy qyzmeti Ekibastuz qalasyndaǵy «Qazposhta» AQ poshta baılanysy bólimshesiniń basshysyna qatysty sybaılas jemqorlyq qylmys jasaý kúdigi boıynsha sotqa deıingi tergeýdi bastady. Ol 9,4 mln teńge kólemindegi bıýdjet qarajatyn jeke tulǵalardyń kartochkalyq shottaryna aýdarý arqyly jymqyrý kúdigine ilindi», - dedi Sybaılas jemqorlyqqa qarsy is-qımyl agenttiginiń 1-shi departamentiniń asa mańyzdy ister jónindegi tergeýshisi Danııar Bekaıdarov onlaın brıfıng barysynda.
Onyń aıtýynsha sonymen qatar Túrkistan oblysynda «Qazposhta» AQ-tyń 2 kassır-operatoryna qatysty qylmystyq is tirkelgen. Olar ózderiniń qyzmettik jaǵdaıyn paıdalana otyryp, «ataýly áleýmettik kómek» memlekettik baǵdarlamasy boıynsha bólingen azamattardyń qarajatyn ıemdengen.
«Jalpy, memlekettiń qoldaýǵa muqtaj azamattardy áleýmettik qorǵaý - áleýmettik qamsyzdandyrý salasyndaǵy memlekettik saıasattyń negizgi baǵyttarynyń biri. Osyǵan oraı, bul baǵyttaǵy bıýdjet qarajatyn tıimdi bólý máseleleri Sybaılas jemqorlyqqa qarsy is-qımyl agenttiginiń turaqty baqylaýynda. Qabyldanyp jatqan aldyn alý sharalaryna qaramastan, qylmystyq statıstıka osy saladaǵy turaqty buzýshylyqtardy kórsetedi», - dedi ol.
