«Qazposhta» qalaı bir jylda 12 mlrd teńge shyǵyndy 3 mlrd teńge kiriske aınaldyrdy
ASTANA. KAZINFORM – Kassadaǵy aqshany depozıtte aınaldyrǵan bólimsheler, talon arqyly talan-tarajǵa salynǵan janarmaı, jurt qoldanbaıtyn bankomattar, qaryz esebinen aılyq kóterý. «Qazposhta» aktsıonerlik qoǵamynyń basqarma tóraǵasy Ásel Janasova Jibek Joly telearnasyna bergen suhbatynda «Qazposhtany» shyǵynǵa batyryp kelgen júıelik olqylyqtardy atady.
Poshta qyzmetiniń jańa strategııasy
Áýeli ol «Qazposhta» saladaǵy monopolıst bola turyp, qarapaıym kýrerlik uıymdarmen básekede oısyraı utylýynyń sebebin ózinshe túsindirdi.
«Jyldar boıy jalaqy kóterilmegen, ınfraqurylymǵa durys aqsha bólinbegen. Bıznes transportqa baılanysty. Kólik bolmasa, sálemdemeler júrmeıdi. Biz «Qazposhtany» monopolıst deımiz, biraq logıstıka salasynda kýrerlik servıster kóp qazir. Biz úshin olar da básekeles. Bankter qarjylyq servısterdi keńeıtip keledi. Jyl saıyn klıentterdiń sany tómendep jatyr. Sonyń bárine tótep beretin básekeles bolý úshin ınvestıtsııa salyp, qyzmet deńgeıin kóterý kerek. Jyldar boıy osynyń bári jasalmaǵandyqtan aldaǵy 5 jylda sonyń bárin jolǵa qoıýymyz kerek», - dedi «Qazposhta» basshysy.
Onyń paıymdaýynsha, álem boıynsha dástúrli poshtanyń qyzmet aıasy tarylyp keledi. Onyń ornyn jańa baǵyttarmen toltyrý ózekti bolyp tur.
«2022 jyldyń qazan aıynda «Qazposhtaǵa» basshy bolyp jumysqa kiristim. Kelgennen keıin bir aıdaı basqa poshtalyq operatorlardyń bıznesin zerdeledim. Naryqta ne bolyp jatqanyn túsiný kerek boldy. Negizi naryqta poshtalardyń bári shyǵynǵa ushyrap ketken. Óıtkeni kýrerlik qyzmetter, basqa da kommertsııalyq uıymdar poshtanyń dástúrli qyzmet kólemin ıgerip ketken. Onyń ústine adamdardyń hat almasýy, gazet aldyryp oqýy jyldan-jylǵa azaıyp keledi. Jyl saıyn qyzmet kólemi 20 paıyz azaıyp jatyr. Sondyqtan búkil poshtalar jańa strategııasyn izdeýge kirisken. Onyń máni nede? Elektrondy saýdanyń damýyna baılanysty jetkizý servısimen, marketpleıstermen birge jumys isteı otyryp «Qazposhtanyń» rólin nyǵaıtýǵa bolatynyn kórdik. Naryqta «3PL» degen model bar. Poshta buryn «2PL» modeli boıynsha jumys isteıtin operator edi – suryptaý, tasymaldaý ǵana qyzmetin atqaratyn. Endi oǵan saqtaý fýnktsııasy qosylyp otyr», - dedi Ásel Janasova.
Pinduoduo men «Qazposhta» qalaı áriptes bola alady?
«Qazposhta» basshylyǵy kásiporyndy Ortalyq Azııa kóleminde taýar jetkizý tizbeginiń óńirlik dálizi etýdi kózdep otyr. Ol úshin áýeli Qazaqstandaǵy logıstıkany tolyq qolyna almaqshy.
«Men Saýda mınıstriliginde jumys istep júrgende «Amazon» sııaqty kóptegen halyqaralyq marketpleıster Qazaqstanǵa taýar jetkizbeıtin. Qazaqstandy qoıyp, Ortalyq Azııaǵa ákelmeıtin. Poshta arqyly arzan jetkizý, Ortalyq Azııaǵa jetkizý servısterin jasaý – eń negizgi baǵyttarymyzdyń biri. Búgin qarap otyrsaq, Qytaıdan jylyna 6 mln sálemdeme kiredi. Ol – az. Qytaıdyń ózinde kúnine 100 mln sálemdeme júredi. Qytaıda AliExpress-ten basqa Shenpin, Pinduoduo sııaqty marketpleıster kóp. Aýyl adamdary da osyndaı marketpleısterden keregin satyp alyp, «Qazposhtanyń» jetkizý qyzmetin paıdalana alýy kerek», - dedi ol.
Aıtýynsha, «Qazposhtanyń» óńirlerdegi eń birinshi problemasy – jalaqy.
«Biz áleýmettik kompanııa bolǵandyqtan Prezıdentke 20 myń adamnyń jaǵdaıyn jaqsartý týraly ýáde berdim. Ekinshiden, qalaıda jańa strategııamen jyldar boıy kele jatqan shyǵyndy qysqartyp, «Samuryq-Qazynanyń» basqa portfeldik kompanııalarynan qalmaıtyndaı kásiporyn etýdi kózdedik. Sol maqsatpen jalaqylaryn kóterdik, jumys oryndarynyń jaǵdaıyn jaqsarttyq. Úshinshiden, kompanııany úsh jyldyń ishinde tabysty etýimiz kerek edi. Ony oryndadyq. Bizde 2 myń aýylda bólimshe bar. Olardyń bireýinde jóndeý jasalǵan, bireýinde ol da joq. 500 bólimshede ınternet joq. 2024 jyly sonyń bárine ınternet qosamyz. Biz keıbir bólimshelerdi mýltıfýnktsıonaldyq ortalyqqa aınaldyrdyq. Ol jerde poshta qyzmetinen bólek memlekettik qyzmetterdi alatyn ettik. ıaǵnı endi aýyl adamdaryna aýdan ortalyǵyna barýdyń qajeti bolmaıdy. 66 memlekettik servısti «Qazposhta» arqyly alady. Bıyl 200 bólimsheni qostyq. Kelesi jyly sanyn 2 myńǵa kóteremiz. Sonymen qatar osy 200 bólimshede jumys isteıtin qyzmetkerlerdiń jalaqysyn úsh ret kóterdik, ıaǵnı qosymsha fýnktsııalar qosylǵandyqtan aılyqtary da kóbeıedi», - deıdi «Qazposhta» basshysy.
«Qazposhta» aýyldardyń kreatıv ortalyǵyna aınalady
«Qazposhta» degende oıǵa aýyl, aýyl degende ınternet oralady. Spýtnık arqyly ınternet tartý jobasy mekteptermen birge poshta bólimshelerin de qamtymaq.
«Biz Starlink, OneWeb kompanııalarymen mektepti ǵana emes, poshta bólimshelerin de ınternetpen jabdyqtaý boıynsha kelissóz júrgizip jatyrmyz. Óıtkeni aýyldan qalaǵa taýar tasymaldaýda «Qazposhtanyń» róli zor. Sebebi bizdiń kólikter ortalyqtardan aýyldarǵa aptasyna 5 ret qatynaıdy. Keri jolda bos qaıtady. Aýyldaǵylar óz ónimin sol kólikter arqyly jetkize alar edi. Onsyz da bos qaıtyp júr ǵoı. Bizge bul jerde dúken ashý mindet emes. Bizdiń jumysymyz – logıstıka. Qazir marketpleıstermen áriptestik ornatyp, úlken ıntegratsııalar júrgizip jatyrmyz. Bıyl eki úlken marketpleısti qostyq. Bizde «tapsyrys taratý beketteri» degen bar. «Qazposhtany» shyǵyndy emes, tabysty kásiporyn qylý úshin agenttik bıznesti damytamyz. Marketpleıster men bankter aýyldarda óz bólimshelerin ashpaıtyndaı, kólik satyp alýdyń ornyna bizdiń qyzmetimizge júginetindeı jaǵdaıǵa keltirýimiz kerek. Úlken marketpleısterge osyndaı jaqsy servıs jasasaq, bul ekonomıkaǵa da, adamdarǵa da jaqsy. Aýyl men qalanyń qatynasyn jańa deńgeıge kóteretin servısti kelesi jyly jolǵa qoıyp bastaımyz», - deıdi aktsıonerlik qoǵam basshysy.
Sondaı-aq ol ınternet bar poshta bólimsheleriniń ózinde ǵalamtor sapasy tómen ekenin aıtty.
«Qazir aýyldardaǵy bólimshelerde ınternet bar degenniń ózinde onyń jyldamdyǵy 1 megabıt qana. Ondaı jyldamdyqpen memlekettik qyzmetti 30 mınýtta beremiz. Sondyqtan ınternet jyldamdyǵy keminde 256 megabıt bolý kerek», - dedi Ásel Janasova.
«Qazposhta» bólimsheleri aldaǵy 30 jylda Mádenıet úıleriniń mindetin atqarýy da múmkin. Kásiporyn basshylyǵynyń osyndaı jospary bar kórinedi.
«Biz Mádenıet jáne aqparat mınıstrligimen birge aýyldarda kreatıvtik ortalyqtar ashýdy josparlap otyrmyz. Buryn Mádenıet úıleri bolyp edi ǵoı. Bizdiń bólimshelerdi jaǵdaıymyz kelgenshe sol Mádenıet úıleriniń qazirgi qyzmetin atqaratyn ortalyqtarǵa aınaldyrsaq deımiz. ıAǵnı, kelesi 30 jyldyń talaptaryna tótep beretindeı durys kreatıv ortalyqtar etemiz. Solarmen birge ınterneti bar kompıýter zaldaryn, telemedıtsına beketterin ashýǵa bolady. Biz bólimshelerge jóndeý júrgizemiz. Sonyń aqshasy bar. Aýyldarda óz bólimshelerin ashqysy kelmeıtin, biraq onlaın qyzmet kórsetetin basqa mınıstrlikter men kompanııalar bar. Sol qyzmetterine bizdegi ınternetti paıdalana alady, ıaǵnı bizdiń bólimsheler poshta qyzmetin ǵana kórsetip qoımaı, memlekettik organdar men aýyl turǵyndaryn baılanystyratyn orynǵa aınaldyrý oıymyzda bar. Onyń bári bir jylda istelmeıdi. Kelesi jyly 3 ortalyq quryp kóremiz. Paıdaly ekeni dáleldense, jańaǵy aıtqan 2 myńnan astam aýylda da ashylady. Qazir ár aýdanda «Azamattarǵa arnalǵan úkimettiń» bólimsheleri bar. Olar ǵımarat jaldap otyr. Solardy «Qazposhta» bólimshelerimen biriktirip jatyrmyz. Osy arqyly memleket qarajatyn únemdeýge bolady», - deıdi ol.
Shyǵynǵa batyrǵan bassyzdyqtar
Ásel Janasovanyń «Qazposhta» tizginin ustaǵanyna bir jyldan asty.
«2022 jyly 12 mlrd teńge shyǵynmen qabyldap aldym. Qaryz degennen shyǵyn degen durys. Jalpaq tilmen aıtqanda, mınýsqa kirip ketken. Shyǵyny kóp, al tabysy bolmaǵan. Josparly shyǵyny bar kompanııa bolǵan. Meniń oıymsha, mınýsqa baǵyttalǵan josparmen jumys isteý degen durys emes. Men kelgen kezde 20 myń qyzmetkerdiń aılyǵyn 25 paıyz ındeksteý kerek boldy, ıaǵnı 2023 jylǵy shyǵynymyzǵa qosymsha 10 mlrd teńge qosyldy. Ol úshin jospardaǵy tabysty da 10 mlrd teńgege kóterdik. 2023 jyldy biz +3 mlrd teńgemen jaýyp jatyrmyz», - deıdi.
Sondaı-aq ol shyǵynǵa qurylǵan josparly jyldy qalaısha tabyspen aıaqtaǵanyn túsindirdi.
«Eń birinshiden, shyǵyndy ońtaılandyrdyq. 10 mlrd teńgeniń kerek emes josparyn, kerek emes jobalardy toqtattyq. Mysaly, IT salasyn aıtaıyq. Biz de bank qyzmetin kórsetemiz – 500 bankomatymyz bar. Solardyń qyzmetin qoldaýǵa úlken aqsha ketedi. Sanasaq, 250-i jumys istep turǵan joq. Ekinshiden, logıstıkalyq kompanııa bolǵandyqtan janarmaı jumsaımyz. Jylyna 2 mlrd teńgeden astam aqshany benzınge, kólikterdiń júrip-turýyna jumsaımyz – jóndeýi bar, saqtandyrýy bar. Odan keıin aktıvterdi túgendedik. Tsıfrlandyrý bolmaǵan. Birinshi GPS qoıýdan bastadyq. «Osyndaı marshrýtta júrdim, osynsha lıtr benzın ketti» dep talon suraıdy. Osylaı bári «áýmın» dep ketip jatqan. GPS ornatyp qarasaq, kóbi barýy kerek aýylǵa barmaıtyn bolyp shyqty. Ondaı kimge unasyn? Basynda GPS-ti syndyryp, ınternet istemeı qalǵanyn jeleý etkender boldy. 2 aıdaı arpalystyq. GPS ınternet bolmasa da, aqparat jınaıdy. Sonyń bárin ınternet paıda bolǵan kezde ortalyqqa jiberedi. Sonyń bárin túsindirdik. Bul bir úlken keıs boldy», - dedi Ásel Janasova.
«Qazposhta» bashysy kassadaǵy bylyqtar da kásiporyn jumysyn turalatyp kelgenin aıtady.
«Biz bank bolǵandyqtan kassada tekserister bolý kerek. Bir kúni kenetten búkil kassalardy tekserdik. Kassada aqsha jetpeıtin bolyp shyqty. Kóbinese kassadaǵy aqshany alyp, depozıtke salyp qoıady eken nemese bankomatta aqsha bar deıdi, ınkassatsııa jasaıdy. Biraq shyn máninde ol jerde aqsha bolmaıdy. Ol kezde aqsha depozıtte aınalyp jatady. Kerek kezinde sheship ákele qoıady. Ondaı shemalar kóp. Sol shemalardy baqylaýdy basym baǵytqa qoıdyq. Kúndelikti qansha sálemdeme jiberildi, qansha adam jumysqa shyqty? 20 myń qyzmetkerdi qadaǵalaý óte qıyn. 2024 jyly qansha adam naqty jumys istep júrgenin, sálemdemeler qanshalyqty ýaqytynda jetkizilip jatqanyn zertteımiz. Kompanııa jumysyn ońtaılandyrýdyń bir baǵyty osy tóńirekte júredi. Biz qaryz almaımyz. Buryn bolǵan. Mysaly, 2022 jyly eńbekaqyny 15 paıyz ındeksteý úshin 7 mlrd teńge bólgen. 2023 jyly biz bir tıyn da suraǵan joqpyz. Qazir «Qazposhtanyń» 100 paıyz aktsııasy memlekette. Maǵan deıin ony jeke menshikke satý týraly áńgime bolǵan. Biraq memlekettiń satpaı qoıǵany durys boldy dep esepteımin. Óıtkeni sol kezdegi ahýalymen shyǵarylsa, tym arzanǵa satylyp ketetin edi. Biraq úlken ınvestıtsııa kerek. Qazir ІRO-ǵa shyǵarý degen erterek shyǵar. Strategııalyq ınvestorlar kelse, ІT salasyna, kólik parkine, qoımalarǵa aqsha tartýǵa bolady. Onsyz poshta damymaıdy», - deıdi aktsıonerlik qoǵam basshysy.
