«Qazposhta» fılıaldarynan 273 mln teńge urlanǵan
«Qazposhta» AQ-nyń óńirlerdegi fılıaldarynda júrgizilgen ishki tergeý jumystarynyń nátıjesinde bıyl 273 mln teńge jymqyrylǵany anyqtaldy, dep habarlaıdy Kazinform.
«Qazposhta» AQ-da ishki tergeý jumystary jalǵasyp jatyr. Osylaısha, 2023 jyldyń qorytyndysy boıynsha birqatar óńirde jalpy somasy 273 mln teńgeni quraıtyn qarjylyq zań buzýshylyqtar anyqtaldy.
Qazirgi tańda ishki tekserý materıaldary protsessýaldyq sheshim qabyldaý, kúdiktilerdi jaýapqa tartý, sondaı-aq keltirilgen shyǵyn somasyn óteý úshin ekonomıkalyq tergeý departamentine joldandy.
Zań buzýshylyq faktileri qatarynda jymqyrý, alaıaqtyq, urlyq jáne zańsyz syıaqy alý faktileri bar. Barlyǵy 7 óńirlik fılıalda 11 qylmystyq is tirkeldi», — delingen mekeme málimetinde.
«Qazposhta» AQ aqparatynda vedomstvonyń ortalyq keńsesinde jáne jergilikti jerlerde zań buzýshylyq árekettermen kúres odan ári jalǵasatyny aıtylǵan. Bul baǵytta mekeme basshylyǵy quqyq qorǵaý organdarymen birlesip jumys istemek.
