Qazposhta elordada táýlik boıy jumys isteıtin Aqsha aýdarymdar ortalyǵyn ashty
ASTANA. QazAqparat - «Qazposhta» AQ Astanada táýlik boıy jumys isteıtin Aqsha aýdarymdary ortalyǵynyń ashylýy jaıly habarlaıdy.
Bul ortalyq №17 úlgili poshtalyq baılanys bólimshesiniń negizinde iske qosyldy.
Aqsha aýdarymdar ortalyǵy 24/7 formatynda jumys istep, «SALEM, TENGE!» jedel aqsha aýdarymdaryn, memleket ishindegi poshtalyq aýdarymdardy, halyqaralyq aýdarymdardy jáne «Western Union» júıesi boıynsha aýdarymdardy júzege asyrady. Sonymen qatar klıentter valıýtany aıyrbastap, kommýnaldyq, salyq jáne basqa da tólemderdi júzege asyrý qyzmetin paıdalana alady, dep habarlaıdy kompanııanyń baspasóz qyzmeti.
«Bul pılottyq joba bolǵandyqtan, qazir táýlik boıy tek bir ǵana operator jumys isteıdi, biraq keleshekte biz klıentter úshin tórt operatorlyq terezeni iske qosýdy josparlaımyz. Aqsha aýdarymdar ortalyǵy tehnıkalyq úzilistermen qyzmet atqaratyn bolady, olar 19:00-den 20:00 deıin jáne 23:45-ten 00:15 deıin» - dep túsindirdi «Qazposhta» AQ baspasóz qyzmetiniń jetekshisi Baıram Azızov.
Búgingi tańda №17 úlgili bólimshe jeke jáne zańdy tulǵalarǵa qyzmet kórsetip, klıentterdi poshtalyq jáne banktyq qyzmettermen tolyq qamtamasyz etedi. Elektrondyq kezek pen táýlik boıy ashyq turatyn, onyń ishinde bankomat, tólem termınaldary jáne postamaty bar «POST 24» atty avtomattandyrylǵan zonamen jabdyqtalǵan.
«Qazposhta» AQ - poshtalyq, qarjylyq jáne logıstıkalyq qyzmetterdi usynatyn Qazaqstan Respýblıkasynyń ulttyq poshta operatory. Dúnıejúzilik poshta odaǵynyń múshesi, VISA International jáne MasterCard Worldwide halyqaralyq tólem júıeleriniń qatysýshysy. «Samuryq-Qazyna» AQ kompanııanyń jalǵyz aktsıoneri bolyp tabylady.
