Qazposhta ekonomıkalyq operator mártebesin aldy
NUR-SULTAN. QazAqparat - «Qazposhta» AQ úshin Ýákiletti ekonomıkalyq operator mártebesi Eýrazııalyq ekonomıkalyq odaq memleketteriniń kedendik shekarasynan ótetin júkterdi jeńildetilgen tártipte resimdeýge múmkindik beredi. Bul óz kezeginde Qazaqstanǵa jáne shetelge halyqaralyq poshta jóneltilimderi men júkterdi jetkizý jumystaryn jyldamdatýǵa septigin tıgizedi.
Ulttyq poshta operatory ekonomıkalyq operator mártebesi arqyly kedendik rásimderdi ótýge jumsalatyn ýaqytty qysqartady jáne logıstıkalyq tizbekti ońtaılandyrady.
Onyń ishinde kompanııa klıentterge júk jetkizilgen kezde ony kedendik resimdeýden jedel túrde ótkizý, kedendik deklaratsııany tapsyrýǵa deıin júkterdi berý, aldyn ala jáne elektrondyq deklaratsııalaý qyzmetterin usynady.
Eger júk kedendik baqylaýǵa jiberilse, tekserý jumystaryn uzaq protsedýralarsyz jáne kezeksiz júzege asyrýǵa bolady.
Buǵan deıin Qazposhta kedendik operator mártebesin aldy. Onyń arqasynda kompanııa Kedendik odaqqa kiretin memleketterdiń shekarasynan ótetin halyqaralyq poshta jóneltilimderi men júkterdi rásimdeý boıynsha qyzmettiń tolyq keshenin usynyp otyr.
Qazposhta kúndelikti túrde úlken kólemde taýar jetkizetin jeke tulǵalarǵa, shaǵyn jáne orta bızneske, iri kompanııalarǵa kedendik rásimdeý qyzmetin kórsetedi.
Búginde bul qyzmet Nur-Sultan, Aqtaý jáne Almaty qalalarynda qoljetimdi.
Qazposhta aldaǵy ýaqytta onyń aıasyn keńeıtip, elimizdiń barlyq oblys ortalyqtarynda júkterdi kedendik rásimdeý qyzmetin usynady.
Atap ótken jón, Qazaqstan azamattary sálemdemeniń quny 200 evrodan assa jáne (nemese) salmaǵy 31 keliden artyq bolsa, ony kedendik rásimdeý sharalaryn júzege asyrady.
«Ekonomıkalyq jáne kedendik operatorlar mártebelerin alý – bul keshendi logıstıkalyq qyzmettiń modelin qalyptastyrý jolynda kompanııa qyzmetin transformatsııalaý aıasynda júzege asyrylyp otyr. Bizdiń áriptesterimizge jetkizýden bastap saqtaýǵa deıin, tapsyrystardy basqarýdan bastap onyń qozǵalysyn baqylaýǵa deıingi logıstıkalyq servıstiń tolyq tizbegin usynamyz. Jańa mártebelerdiń artyqshylyqtary Qazposhtanyń ınfraqurylymy men qyzmeti arqyly halyqaralyq jáne ishki júk tasymalyn, Qazaqstan aýmaǵy arqyly poshta jóneltilimderiniń tranzıtin damytýǵa oń yqpalyn tıgizedi», - dep atap ótti «Qazposhta» AQ Basqarma tóraǵasy Qanat Alpysbaev.
Qazposhta otandyq kompanııalarmen elimizdiń aýmaǵynda júk tasymaldaý qyzmetterin kórsetý boıynsha jemisti yqpaldastyq ornatty.
Endi Ulttyq poshta operatory ekonomıkalyq jáne kedendik operator mártebeleri negizinde TMD, Ortalyq Azııa, Eýropalyq odaq memleketterine halyqaralyq júk tasymal qyzmetin iske qosýdy josparlap otyr.
