«Qazposhta» biregeı baılanys alańyn iske qosty
ASTANA. QazAqparat - «Qazposhta» AQ kópshilikke qoljetimdi, erkin jáne tegin taralatyn www.post.kz elektrondy poshtasyn iske qosty. Portal memlekettik organdardy, bıznesti jáne halyqty bir baılanys alańyna biriktiredi, dep habarlaıdy «Qazposhta» AQ baspasóz qyzmetinen.
«Memleketimizdiń aqparattyq tehnologııalarynyń damýymen, qazaqstandyqtar qyzmetterdiń kóbimen ýıden shyqpaı qoldana alady. www.post.kz Ulttyq elektrondy poshtasy onlaın qyzmetterdiń tizimin kóbeıtip, olardyń qoldanýyn yńǵaılandyrady. Bul alań abonenttik jáshik nusqasynda, elektrondy túrde iske qosylyp, kerekti hattar men habarlandyrýlardy, memlekettik organdar, bıznes ókilderi men halyq arasyndaǵy qujattardy jetkizýge arnalǵan. Jobanyń iske asýynda, elektrondy úkimet operatory «Ulttyq aqparattyq tehnologııalar» AQ-men yntymaqtastyǵymyz mańyzdy oryn alýda» - dep túsindirdi «Qazposhta» AQ basqarma tóraǵasy Baǵdat Mýsın.
«Birlesip qyzmet kórsetý barysynda, www.post.kz pen www.egov.kz arasyndaǵy biregeı qýattaý júıesi iske asyrylady. Bul yntymaqtastyq nátıjesinde Qazposhta men elektrondy úkimettiń qyzmetterimen bir esepti jazba arqyly qoldanýǵa bolady. Endi memlekettik qyzmetterge tapsyrys berýden bastap, qujattardyń tólnusqasyn poshta arqyly jetkizý sııaqty keshendi formatta qyzmet usynylady» - dedi «UAT» AQ basqarma tóraǵasy Rýslan Eńsebaev.
Joba barysynda «Qazpochta» AQ bólimshelerde usynylatyn poshtalyq jáne qarjy qyzmetteriniń elektrondy nusqasyn qosady. Endi qazaqstandyqtar elektrondy poshta qyzmetterimen birge, jol erejesin buzǵan úshin aıyppuldardy jáne basqa da tólemderdi iske asyryp, sálemdemelerdi resimdep jáne bólimshedegi kezekti brondaı alady. Sonymen qatar klıentter sálemdemelerdiń keler mekenjaıyn aýystyryp, yńǵaıly bolatyn bólimshege nemese úıge jiberip, gıbrıdti elektrondy hat jibere alady, ıaǵnı Qazposhta qyzmetkerleri elektrondy túrde kelgen hatty kerekti mekenjaıda basyp shyǵaryp, qaǵaz túrinde jetkizedi.
www.post.kz ulttyq elektondy poshtasy arqyly onlaın-treıdıng qyzmetimen ınvestıtsııalar jáne qundy qaǵazdarmen Qazaqstan qor bırjasynda kelisimder men alyp-satý operatsııalaryn júzege asyrýǵa bolady.
Jobany júzege asyrý nátıjesinde, Qazaqstanda ózimizdiń elektrondy poshta júıemiz paıda bolyp, sheteldik elektrondy poshta júıelerine balama retinde qyzmet istep, barlyq málimetti qazaqstandyq serverlerde saqtaıtyn bolady. Al Qazposhta hattar men habarlamalardy jetkizý ýaqytyn únemdep, onlaın-treıdıng, postamat, poshtalyq ındekster, elektrondy kezek jáne t.b. qyzmetterdiń sapasyn kóterýge jol ashady.
