«Qazposhta» basshysy óziniń jalaqysy nelikten joǵary ekenin aıtty
ASTANA. QazAqparat - Búgin Ortalyq kommýnıkatsııalar qyzmetindegi brıfıngte «Qazposhta» AQ basqarma tóraǵasy Baǵdat Mýsın kompanııanyń dırektorlar keńesine óziniń jalaqysyn qysqartý týraly usynys jasaǵandyǵyn málim etti.
«Jalaqynyń aıyrmashylyǵyna toqtalatyn bolsa, bizdiń salada onyń aıyrmashylyǵy joǵary. Osy oraıda biz (basshylyq) jalaqyny tómendetý týraly usynyspen shyqtyq. Keńes tarapynan «eger de osy qadam qabyldanǵan jaǵdaıda qansha qarjy únemdeledi?» degen saýal qoıyldy. Esepteýler barysynda 0,01 paıyz kóleminde bıýdjetten qarjy únemdeletinin aıqyndadyq. Osy oraıda basshylyqtyń jalaqysyn tómendetkennen eshqandaı nátıje bolmaıtyny aıtyldy. Bul turǵyda dırektorlar keńesi bizdiń aldymyzǵa tabystyń jańa kózderine mán berýdi júktedi. Sonymen qatar olar osyndaı kóterińki jalaqysy bizge joǵary talaptar qoıylǵandyqtan belgilengenin atap ótti», - dedi B.Mýsın.
Onyń aıtýynsha, «Qazposhtada» 22 myń adam qyzmet etedi, onyń 50 paıyzy - aýyldyq jerlerde. Qyzmetkerlerdiń jalaqysyn kóterý úshin «Qazposhtanyń» tabysyn arttyrý kerek.
«Ótken jylmen 2013 jyldy salystyratyn bolsaq, byltyr biz 2,5 mlrd. teńge artyq kiris jasadyq. Osy qarjynyń ishinde óndiristik qyzmetkerlerdiń eńbegin tóleý qoryn ósirýge 2,2 mlrd. teńge baǵyttaldy. ıAǵnı, normanyń ústindegi tabystyń 95 paıyzyn óndiristik qyzmetkerlerdiń aılyǵyn arttyrýǵa jumsadyq. Bul turǵyda ákimshilik qyzmetkerler qamtylǵan joq», - dedi ol.
Esterińizge sala keteıik, budan buryn Nur.kz portalyna bergen suhbatynda Baǵdat Mýsın «Qazposhta» AQ basqarma tóraǵasy retinde jalaqysy 1,5 mln. teńge ekenin aıtqan bolatyn. Salyqtyq tólemder ustalǵannan keıin qolyna 1,2 mln. teńge alady eken.
