«Qazposhta» baspasóz basylymdaryna jazylý men olardy taratý baǵasyn 10 paıyzǵa tómendetti
ASTANA. 25 mamyr. QazAqparat /Aıdar Ospanalıev/ - Baılanys jáne aqparat mınıstrligi merzimdi basylymdardyń qyzmetin jetildirý maqsatynda keshendi sharalar atqarýda.
Osy baǵyttaǵy jumystardyń nátıjesinde «Qazposhta» ulttyq kompanııasy» aktsıonerlik qoǵamy baspasóz basylymdaryna jazylý men olardy taratý baǵasyn 10 paıyzǵa tómendetti. Bul týraly búgin Baılanys jáne aqparat mınıstri Asqar Jumaǵalıev Astanada ótip jatqan Bas redaktorlar klýby forýmynda málim etti.
Onyń aıtýynsha, osy ýaqytta merzimdi basylymdardyń qyzmetin jetildirý maqsatynda jergilikti jáne respýblıkalyq basylym ókilderimen trenıngter ótkizilip turady. Sondaı-aq atalmysh basylymdarǵa memlekettik aqparattyq tapsyrysty oryndaý barysynda qarjylyq kómek kórsetedi. Buǵan qosa qazaqtildi basylymdardyń ınternet-úlgilerin daıyndaıtyn agregator-saıt «Baq.kz» saıty iske qosyldy.
