«Qazposhta» aımaqtarǵa mektep oqýlyǵyn jetkizýge yntaly
ASTANA. QazAqparat - «Qazposhta» respýblıka óńirlerindegi mektepterge oqýlyqtardy jetkizýmen aınalysýy múmkin. Bul týraly búgin Májiliste «Oqýshylardy oqýlyqtarmen jáne oqý-ádistemelik keshendermen qamtamasyz etý problemalary men sheshimderi» taqyrybynda ótken Úkimet saǵatynda málim boldy.
Toqtala ketetin jaıt, oqýlyq tapshylyǵyna qatysty Bilim jáne ǵylym mınıstri Aslan Sárinjipov negizgi problemalardyń biri retinde oqýlyqtardyń jetkizý júıesin synaǵan bolatyn. «Biz oqýlyq tapshylyǵyna qatysty arnaıy komıssııa quryp, ol boıynsha oqýlyq tizimin bekitý men olardy mektepke jetkizýge deıingi tizbekti qarap, tekserip shyqqan bolatynbyz. Sonyń ishinde oqýlyqtardy jetkizý júıesinde kemshilikter bar ekeni, oǵan birqatar ózgerister engizý qajettigi belgili boldy», - deıdi A. Sárinjipov. Onyń aıtýynsha, jetkizip berýshiler ártúrli júıemen jumys isteıdi. Máselen, biri mektepke deıin tolyq jetkizse, endi biri tek oblys, aýdan ortalyqtaryna deıin ǵana qamtamasyz etedi.
Osyǵan oraı, depýtattar tarapynan óńirlerdegi mektepterge oqýlyqtardy jetkizý máselesin «Qazposhta» AQ berý kóterilgen edi. «Sizder óńirlerdegi mektepterge deıin oqýlyqtardy ýaqytyly jetkizýdi qamtamasyz ete alasyzdar ma?» dep surady «Qazposhta» ókilinen depýtat Darıǵa Nazarbaeva.
«Biz mektepterge deıin oqýlyqtardy jetkizýdi qamtamasyz etýge daıynbyz. Bizde 1637 birlik avtokólik, 54 poshtalyq vagondar, iri gabarıtti júk tasymaldaıtyn qyzmetterimiz de bar. Sondyqtan da, biz búgingi tańda oqýlyqtardy mektepke deıin qamtamasyz etýdi tolyq júzege asyra alamyz. Onyń tarıfin biz jeke qarastyrýǵa da daıynbyz», - «Qazposhta» AQ Basqarma tóraǵasy Baǵdat Mýsın.
