Qazposhta: «Aıaz Ataǵa hat jaz» aktsııasy bastaldy
ASTANA. QazAqparat - «Qazposhta» AQ 20 jeltoqsanǵa deıin jalǵasatyn «Aıaz Ataǵa hat jaz» naýqanynyń bastalǵanyn habarlaıdy.
Qazirgi tańda barlyq oblystyq ortalyqtardyń poshtamttarynda, sonymen qatar Astana, Almaty jáne Aqtóbe qalalarynyń «Mega» saýda oıyn-saýyq ortalyqtarynda Aıaz Ataǵa hat jiberýge arnalǵan jáshikter ornatylǵan.
«Ótken jyly biz ártúrli ótinish jazylǵan myńdaǵan hat qabyldadyq. Bireýi jańa smartfon surasa, basqasy kópten boıy kámpıt jemegenin jazady. Balalarmen qatar, kıim men taǵam ónimderin suraıtyn zeınetkerler de hat jazady. Sponsorlardyń kómegimen jáne ózimizdiń kúshimizben, balalar men basqa da nıet etken adamdardyń armandaryn oryndaımyz. Osy jyly, qoldaý ótinishine «Kazahınstrah» SK, Beeline Kazakhstan, «OYLA» jýrnaly jáne «Alina Paint» atsalysty. Sonymen birge, óńirlerdegi kishi jáne orta bıznes ókilderi kómek berýde. Bireýdiń armanyn oryndap, Jańa jyl aldyndaǵy syıqyrdyń bar ekenin dáleldeý - biz úshin óte jaǵymdy is» - dedi «Qazpochta» AQ baspasóz qyzmetiniń jetekshisi Baıram Azızov.
20 jeltoqsanda hattardy qabyldaý toqtatylady. Barlyq hattar «Qazposhta» AQ bas keńsesinde jınalyp, suryptalǵannan soń, seriktester men kompanııa ókilderinen turatyn arnaıy komıssııa syılyqtardy tańdaıdy. Birinshiden syılyqtardy áleýmettik turǵyda qorǵalmaǵan, tabysy az turǵyndardyń balalary, jetimder alady.
Hattar óńdelgennen keıin, syılyqtar elimizdiń óńirlerine jáne fılıaldarǵa jiberiledi. Syılyqtardy Aıaz Ata men Qarshaqyz bolyp kıingen kompanııa men seriktesterdiń qyzmetkerleri, BAQ ókilderi tapsyrady.
Syılyqtarmen birge Aıaz Atanyń quttyqtaý sózderi jazylǵan ádemi hattar tabystalady. Ol úshin balalar óz mekenjaıyn jazýdy umytpaý kerek.
