«Qazposhta» aýyldyq jerlerde bólimshelerin ustaýdan 4 mlrd. teńge zııan shegip otyr
ALMATY. 7 aqpan. QazAqparat - «Qazposhta» AQ-nyń aýyldyq jerlerdegi bólimshelerinde keıbir qyzmet túrleriniń tarıfi kóterilýi múmkin.
Bul týraly búgin Almatyda ótip jatqan «Qazaqstandaǵy saýda mıssııasy (Eýropa-Qazaqstan-Azııa)» dep atalatyn konferentsııada aıtyldy.
«Bizdiń aýyldyq jerlerde 2,5 myń bólimshemiz bar. Onyń 1300-den astamy - turǵyndarynyń sany 2 myńǵa jetpeıtin eldi mekenderde. Bir aýylǵa aıyna orta eseppen 1 sálem-saýqat, 10 hat, 300 gazet jetkizemiz. Olardy aıyna keminde 3 ret aparamyz. Sondaı-aq 2-3 kún zeınetaqy, járdemaqy nemese jergilikti uıymdardyń jalaqysyn jetkizýge ketedi. Qazir aktsıonerlerdiń aldyna shyǵyndardy ońtaılandyrý týraly másele qoıyp jatyrmyz», - deıdi «Qazposhta» AQ Basqarma tóraǵasynyń orynbasary Murat Jarylqaǵanov. Onyń aıtýynsha, aýyldyq bólimshelerdi ustaýda olarǵa kim, qalaı kómektesetinin anyqtaý qajet. Óıtkeni qazir «Qazposhta» aýyldyq bólimshelerdi ustaýda 4 mlrd. teńge shyǵyn shegip otyr. Sondyqtan búgingi tańda ondaǵy jekelegen qyzmet túrleriniń tarıfin kóterý nemese ózge qarjy quraldaryn tartýdyń joldaryn izdestirý jaıy qarastyrylyp jatyr.
