Qazposhta aýyl turǵyndaryna jańa servıs usynady
NUR-SULTAN. QazAqparat - Ulttyq poshta operatory jáne iri ınternet-provaıder klıentter úshin jańa servısterdi damytady. «Qazposhta» AQ jáne «Ksell» AQ basshylary yntymaqtastyq týraly memorandýmǵa qol qoıdy, dep habarlaıdy QazAqparat.
Memorandým aıasynda qolǵa alynatyn barlyq jobalar birinshi kezekte aýyldar men aýdan ortalyqtarynda turatyn qazaqstandyqtardyń qajettilikterin óteýge baǵyttalǵan.
Eldi meken turǵyndary Qazposhtanyń jergilikti bólimsheleri arqyly smartfondarǵa tapsyrys berý múmkindigine ıe bolady. Olarǵa qajetti gadjetterdi qolma-qol aqshaǵa jáne bólip tóleý arqyly satyp alýdyń tıimdi sharttary usynylady.
Sonymen birge turǵyndar Post.kz saıty nemese mobıldik qosymshasy arqyly Kcell ınternet-dúkeninen taýarlarǵa tapsyrys berý múmkindigin ıelenedi. Ony Qazposhta elimizdegi kez kelgen óńirge jáne shalǵaı aýyldarǵa jetkizedi. Ulttyq poshta operatory agenttik jáne poshtalyq qyzmet arqyly aýyl turǵyndaryna tsıfrlyq ónimderge teń qoljetimdilikti qamtamasyz etedi.
«Qazposhta tsıfrlyq transformatsııa aıasynda qyzmetterdi jetildirýge jáne elektrondyq saýdanyń áleýetin damytýǵa basymdyq berip otyr. Oǵan bizdiń jáne áriptesimizdiń resýrstar sınergııasy de septigin tıgizedi. Marketpleıster, Fullfilment-ortalyqtar jáne poshta-logıstıkalyq qyzmetter negizinde birlese áreket etý arqasynda tolyq keshendi servıstiń ekojúıesi qalyptasady. Bul rette birinshi kezekte aýyl men aýdan turǵyndaryna qolaıly jaǵdaı jasaýǵa nazar aýdarylǵan. Búginde bizdiń saıtymyzda jáne mobıldi qosymshamyzda «marketpleıster vıtrınasyn» qalyptastyrý baǵytynda belsendi jumystar júrgizilýde. Onyń arqasynda shalǵaı aýyldyń turǵyndary ózderine qajetti taýarlardy tańdap, olardyń jetkizilýine tapsyrys bere alady», - dep atap ótti «Qazposhta» AQ Basqarma tóraǵasy Qanat Alpysbaev.
«Biz elimizdiń barlyq turǵyny úshin budan da qoljetimdi jáne yńǵaıly bolýǵa umtylamyz. Pandemııanyń aýyr kezeńinde biz onlaın satýǵa erekshe kóńil bóldik jáne qatelespedik, óıtkeni bul bizdiń abonentter úshin óte qajetti ári yńǵaıly qyzmet bolyp shyqty. Eger buryn onlaın satyp alýdy negizinen iri qalalardyń turǵyndary jasasa, qazir bizde aýyldyq jerlerden satyp alýshylar kóbeıip keledi. «Kcell» qatysatyn «250 +» jobasynyń arqasynda mobıldi keń jolaqty ınternet 250 adamnan turatyn Qazaqstan aýyldaryna keledi, endi aýyl turǵyndary onlaın qyzmetterdi qala turǵyndarymen birdeı paıdalana alady. Al bizdiń «Qazposhtamen» yntymaqtastyǵymyzdyń arqasynda taýarlardy elimizdiń eń shalǵaı eldi mekenderine jetkizý barynsha qoljetimdi, tezirek jáne senimdi bolady. Biz úshin abonentterimizdiń ózderin jaıly sezinýi óte mańyzdy jáne biz servısterimizdiń deńgeıin kóterý boıynsha únemi jumys isteýdemiz», - dep atap ótti Kcell CEO ıÝrıı Harlamov.
Ulttyq poshta operatory jáne ınternet-provaıder bıylǵy jyldyń sońyńa deıin jańa qyzmetti iske qosady. Onyń arqasynda uıaly telefondaǵy qarjyny Post.kz arqyly Qazposhtanyń kez kelgen tólem kartasyna aýdarý múmkindigi usynylady.
