«Qazposhta» aýyldaǵy bos ǵımarattardy áleýmettik nysandarǵa berýdi pysyqtap jatyr
ASTANA. KAZINFORM – «Qazposhta» AQ poshta bólimsheleriniń alańdaryn tıimdi paıdalaný baǵytyndaǵy jumystar júıeli túrde jalǵasyp jatyr. Bul týraly Premer-Mınıstr Oljas Bektenov depýtattyq saýalǵa bergen jaýabynda málim etti.
Úkimet basshysynyń aıtýynsha, atalǵan jumys aıasynda aýyldyq eldi mekenderdegi bos turǵan úı-jaılardy áleýmettik mańyzy bar nysandarǵa jeńildikti sharttarmen berý tetikteri qarastyrylyp jatyr.
– Poshta bólimsheleriniń paıdalanylmaı turǵan alańdaryn berý úshin jeke baǵdarlama ázirleý qajettiligi joq. Sebebi bul baǵyttaǵy jumystar «Qazposhta» AQ tarapynan óz quzyreti sheńberinde derbes júzege asyrylýda, – dedi Oljas Bektenov.
Sonymen qatar merzimdi baspa basylymdaryn jetkizýdi sýbsıdııalaý fýnktsııasyn Mádenıet jáne aqparat mınıstrligine berý máselesi kún tártibinde turǵan joq.
– «Mass-medıa týraly» zańǵa sáıkes, baspa buqaralyq aqparat quraldaryn memlekettik qoldaý memlekettik emes BAQ-qa granttar berý jáne memlekettik aqparattyq tapsyrys tetikteri arqyly iske asyrylady, – delingen qujatta.
Buǵan deıin aýyldyq poshta qyzmetin sýbsıdııalaýǵa 500 mln teńge bólinetinin jazǵanbyz.
