Qazposhta ataqty qazaq ǵalymdary men oıshyldaryna arnalǵan pochtalyq markalardy aınalymǵa engizýde (FOTO)
ALMATY. QazAqparat - Búgin Almatyda «Qazpochta» AQ Almaty qalalyq ortalyq fılıalynda ataqty Abaıtanýshy ǵalym, aqyn, jazýshy, aýdarmashy Qaıym Muhamedhanovtyń 100 jyldyǵyna oraı, «Estelik jáne mereıtoılyq kúnder» serııasy boıynsha «Qaıym Muhamedhanovtyń týǵanyna 100 jyl» taqyrybynda poshtalyq marka aınalymǵa shyǵaryldy.
Іzgi sharaǵa Qaıym Muhamedhanovtyń týystary, solardyń ishinde qyzy Dına Muhamedhanova, aqyn Maraltaı Raıymbekuly, Abaıtanýshy ǵalym Serikqazy Qorabaı qatysty.
«Bıyl uly ǵalym, aqyn, jazýshy, memlekettik syılyqtyń laýreaty Qaıym Muhamedhanovtyń 100 jyldyǵyn atap ótip jatyrmyz. Osyǵan baılanysty arnaıy marka shyǵardyq. Bul Qaıym Muhamedhanovtyń eńbekterin nasıhattaý ǵana emes, bul sondaı-aq, patrıottyq shara. Osyndaı uly tulǵalardyń ómiri men ónerin úlgi tuta otyryp, búgingi jastardy patrıottyq, ulttyq rýhta tárbıeleý», - dedi «Qazpochta» AQ Almaty fılıaly dırektorynyń orynbasary Ádilbek Momynov.
Osydan keıin markaǵa mór basý qurmeti M. Áýezov atyndaǵy Ádebıet jáne óner ınstıtýty Abaıtaný bóliminiń meńgerýshisi, professor Serikqazy Qorabaıǵa buıyrdy. Ol marka japsyrylǵan birneshe konvertti aldyna alyp, markalardyń shetine mór basyp shyqty.
«Búgingi kún halyq jadynda qalatyn erekshe kún. Osy marka arqyly endi Qazaqstan halqy ǵana emes, shetel jurtshylyǵy da qazaqtyń osyndaı uly ǵalymy bolǵanyn biletin bolady. Qaıym Muhamedhanov qazaq halqynyń mádenıetinde, ádebıettaný salasynda óshpes iz qaldyrǵan uly tulǵa. Alashtyń aqyrǵy abyzy», - dedi óz sózinde professor Serikqazy Qorabaı.
Óz kezeginde Qaıym Muhamedhanovtyń qyzy Dına Muhamedhanova ákesiniń 100 jyldyǵy búkilhalyqtyq sharaǵa aınalǵandyǵyn jetkizdi.
«Tuńǵysh» degen sóz Qaıym Muhamedhanovtyń esimimen tyǵyz baılanysty. Ol tuńǵysh ret - 1940 jyly Semeıde Abaı mýzeıin ashty. Ol tuńǵysh ret - 1945 jyly Qazaq KSR-iniń alǵashqy Memlekettik ánuranyn jazdy. Ol biregeı mátintaný mamany. Ol mátintaný ádisteri arqyly Abaı men Shákirimniń jáne basqa da tarıhı tulǵalarymyzdyń túpnusqalyq sózderin jańǵyrtyp, halqyna usyndy. Ákem Alashorda kezeńindegi biregeı mádenıettanýshy ǵalym», - dedi ol.
Aıta ketelik, poshtalyq markada Qazaqstan Respýblıkasy memlekettik syılyǵynyń laýreaty, ǵalym, aqyn, jazýshy, dramatýrg, aýdarmashy, Abaıtaný men Shákárimtanýdyń ǵylymı negizin qalaýshy, qoǵam qaıratkeri - Qaıym Muhamedhanov beınelengen. Ol Qazaq SSR-nyń (1945j.) Memlekettik ánurany mátininiń avtory, Uly Otan Soǵysyna qatysýshy.
Poshtalyq markanyń nomınaly - «S» lıterli (218) teńge Qazaqstan Respýblıkasy aýmaǵynda jerústi kóligi arqyly salmaǵy 20 grammǵa deıingi tapsyrysty hattardy jóneltýge arnalǵan tarıfke sáıkes keledi. Taralymy - 2 500 000 dana.
Poshtalyq markanyń basylymy ofsettik, 2 boıaýmen, shetindegi oıyqtar ırek tisti. Shyǵarylý túri - markalyq bet. Bir bette - 105 marka. Bettegi marka ólshemi - 26H18 mm. Sýretshi - Sergeı Marshev. Poshtalyq markalar «Qazaqstan Respýblıkasynyń Ulttyq Banki Banknottyq fabrıkasy» respýblıkalyq memlekettik kásipornynda basyp shyǵarylǵan.
Búgin sonymen qatar, Astanada «Qazpochta» AQ-ta qoǵam jáne memlekettik qaıratkerleri - Álıhan Bókeıhanov pen Ybyraı Altynsarınge baǵyshtalǵan markalar da aınalymǵa shyǵaryldy.
