Qazposhta «Altyn sarbaz» markasyn shyǵardy

ASTANA. QazAqparat - QR Aqparat jáne kommýnıkatsııalar mınıstrligi «Ataýly kúnder» serııasymen «Altyn sarbaz» Qazaqstan Respýblıkasynyń alǵashqy poshta markasyna 25 jyl» taqyrybyndaǵy poshta markalaryn aınalymǵa shyǵardy, dep habarlaıdy QazAqparat.

Poshta markasynda 1969 jyly Almaty mańyndaǵy Esik qorǵanynda qazba jumystaryn júrgizý kezinde tabylǵan saq jaýyngeri beınelengen. Ǵalymdar bul qabirdiń bizdiń dáýirimizge deıingi V-VI ǵasyrlarǵa jatatynyn aıtady. Qorǵanda jerlengen jaýyngerdiń kıimi saqtyń «ań stılinde» jasalǵan 4 myńnan astam altyn áshekeımen bezendirilgen. Sarbazdyń bas kıimi sol qorǵannyń pishinine uqsas, uzyndyǵy 65 sm shamasynda. Barsha álemge áıgili «Altyn adam» - bizdiń ulttyq mádenı qundylyǵymyz ári táýelsiz Qazaqstannyń sımvoly.

Markanyń taralymy - 10 000 dana. Markada ÝK-boıaýmen qorǵanysh elementteri qoldanylǵan.Sýretshi K. Plýjnıkova.

Aıta ketý kerek, Qazaqstan Respýblıkasynyń alǵashqy poshta markasy «Ulttyq murajaı qazynalary» serııasy «Altyn sarbaz» degen ataýmen 1992 jyldyń 20 naýryzynda aınalymǵa shyǵarylǵan bolatyn.