«Qazposhta» AQ men SQO ákimdigi yntymaqtastyq týraly memorandým jasasty
Búgin «Qazposhta» AQ Basqarma tóraǵasy jáne Soltústik Qazaqstan oblysynyń ákimi yntymaqtastyq týraly memorandýmǵa qol qoıdy.
Ekijaqty áriptestik Halyqqa qyzmet kórsetý ortalyqtary qarastyrylmaǵan eldi mekenderdiń turǵyndaryna memlekettik jáne áleýmettik qyzmetter úshin «Qazposhta» AQ bólimshelerine júginýge múmkindik bermek. Soltústikqazaqstandyqtar qajetti qyzmetterge aýdan ortalyqtaryna nemese qalaǵa jol tartpaı-aq, tapsyrys beredi. Bul rette olar ózderiniń qarjysyn jáne ýaqytyn únemdeıdi.
«Qazposhta» AQ basshysynyń sózinshe, poshta baılanysy bólimsheleri arqyly áleýmettik mańyzdy qyzmetterdiń kórsetilýi – bul óńir turǵyndary úshin yńǵaıly jaǵdaı jasaýǵa taǵy bir qadam.
« Búginde «Qazposhta» - álemniń kez kelgen núktesinen shalǵaı aýyldarǵa sálemdemelerdi jetkizetin elimizdegi jalǵyz kompanııa. Ótken jyly soltústikqazaqstandyqtarǵa biz 300 myńnan astym poshta jóneltilimderin jetkizdik. Bul kórsetkish 2019 jylmen salystyrǵanda 1,5 ese artyq. Biz kompanııanyń múmkindigin aýyldyq jerlerde turatyn qazaqstandyqtarǵa memlekettik qyzmetti kórsetýge baǵyttaýǵa sheshtik. Elimizdiń barlyq óńirlerinde poshta baılanysynyń keń jelisi bar ekenin eskersek, bul joba qosymsha shyǵyndy talap etpeıdi «, - dep atap ótti «Qazposhta» AQ Basqarma tóraǵasy Qanat Alpysbaev .
Ulttyq poshta operatory memlekettik jáne áleýmettik qyzmetterdi kórsetýge baǵyttalǵan pılottyq jobany Shyǵys Qazaqstan oblysynda júzege asyryp otyr. Bıylǵy jyldyń 1 sáýirinen ShQO 167 poshta baılanysy bólimsheleri turǵyndarǵa egov.kz jáne aleumet.egov.kz portaldary arqyly qyzmet kórsetedi. Bul tájirıbe Soltústik Qazaqstan oblysyndaǵy «Qazposhta» AQ bólimshelerinde de qoldanylmaq.
« Biz barlyǵymyz «Qazposhta» elimizdiń áleýmettik-ekonomıkalyq damýyna úlken úles qosyp júrgenin kórip otyrmyz. Bizdiń oblystyń turǵyndaryna 167 poshta baılanysy qyzmet kórsetedi. Onda 1 304 adam eńbek etedi. Búginde 139 bólimshe avtomattandyrylǵan. Bıyl bul kórsetkishti 100 % jetkizýdi josparlap otyrmyz. Onyń arqasynda oblystyń turǵyndaryna yńǵaıly jaǵdaı jasaımyz «, - dep atap ótti SQO ákimi Qumar Aqsaqalov .
Jospar boıynsha memlekettik qyzmetterdi 100-ge jýyq aýdandyq jáne aýyldyq poshta baılanysy bólimshesi kórsetedi. Soltústikqazaqstandyqtar onda elektrondyq-sandyq qoltańbaǵa jáne basqa memlekettik qyzmetterge onlaın tártipte qol jetkize alady. Sonymen birge arqyly balalarǵa kepildendirilgen áleýmettik paketti alýǵa nemese múmkindigi shekteýli jandarǵa ońaltý quraldaryna ótinim berý qarastyrylmaq.
Sonymen birge tsıfrlyq transformatsııalaý aıasynda áleýmettik kartalardyń múmkindigin keńeıtý josparlanyp otyr. Qazposhtanyń kartalaryna zeınetaqy, járdemaqy, jalaqy aýdarýǵa bolady. Aldaǵy ýaqytta elektrondyq júıelermen yqpaldastyrý jumystary júrgizilgennen keıin, olardy kólik jáne mektep kartalary retinde qoldaný múmkindigi qarastyrylmaq. Kartalardy poshta bólimshelerinde, tólem termınaldarynda, post.kz saıtynda nemese mobıldi qosymshasynda toltyrýǵa bolady.
