Qazposhta 2025 jylǵa qaraı óndiristik alańdardyń aýmaǵyn 2,4 ese ulǵaıtady
NUR-SULTAN. QazAqparat - Qazposhta logıstıkalyq ınfraqurylymdy jańǵyrtý baǵdarlamasyn qabyldady. Búginde ulttyq poshta operatorynyń qaramaǵynda 13 suryptaý ortalyǵy jáne 3 hab bar. Olardyń aýmaǵy 25 myń sharshy metrden asyp jyǵylady. Qazposhta aldaǵy 5 jylda óndiristik alańdardyń kólemin qosymsha 33,4 myń sharshy metrge ulǵaıtpaq, dep habarlaıdy QazAqparat.
« Birinshi kezekte Shymkent, Qaraǵandy jáne Óskemendegi óndiristik alańdar ulǵaıtylady. Bul qalalarda logıstıkalyq ınfraqurylymdy jańartý jumystary qolǵa alyndy. Sonymen qatar biz poshta-logıstıkalyq qyzmettiń sapasyn arttyrý jolynda jumys barysyn barynsha tsıfrlandyrýǵa basymdyq berip otyrmyz. Búginde óndiristik qýattylyqtardy zamanaýı jáne tehnologılyq qurylǵylarmen jabdyqtaý, suryptaýdyń avtomattyq júıelerin jáne aqparattyq baǵdarlamalardy endirý jumystary qolǵa alyndy. Bul rette bizdiń ІT-mamandar jumys protsesin avtomattandyrý úshin arnaıy jasap shyǵarǵan ózimizdiń tsıfrlyq ónimderge basymdyq berip otyrmyz «, - dep atap ótti «Qazposhta» AQ Basqarma tóraǵasy Qanat Alpysbaev .
Tehnologııalar óndiriste eńbek etetin mamandarǵa qolǵabys etpek. «Qazposhta» AQ jasap shyǵarǵan mobıldi qosymsha protsesterdi avtomattandyrý arqyly poshta jóneltilimderin óńdeýge, tıeýge jáne artýǵa jumsalatyn ýaqytty qysqartady.
Baǵdarlama mobıldi termınaldarǵa ornatylady. Skaner arqyly poshta jóneltilimindegi aqparat poshtany tirkeý júıesinde birden kórsetiledi. Onyń negizinde ilespe qujattar avtomatty túrde qalyptasady jáne qyzmetkerge bul aqparatty tikeleı jumys kompıýteri arqyly engizý qajettigi bolmaıdy. Skanerleý jumystary sálemdemeler men hat-habarlar suryptaý ortalyǵyna jetkizilgen kezde jáne olardy jóneltý kezinde eki ret júrgiziledi. Baǵdarlama poshta jóneltilimderi durys baǵdarǵa artylmaǵan jaǵdaıdy da aıqyndaıdy.
Konteınerlik tasymaldy qoldanysqa engizý jáne júkterdi palletteý – qyzmet sapasyn jaqsartýǵa baǵyttalǵan keshendi sharalardyń biri. Bul óz kezeginde poshta jóneltilimderiniń deformatsııalaný yqtımaldyǵyn barynsha azaıtady, konteınerdiń ishindegi zattarǵa qoljetimdilikti shekteıdi, artý-tıeý jumystaryna qajetti ýaqytty qysqartady.
Búginde Qazposhta poshta-logıstıkalyq qyzmettiń sapasyn jaqsartýǵa basa nazar aýdaryp otyr. Oǵan ýaqyt tıimsiz jumsalatyn protsesterdi ońtaılandyrý jáne avtomattandyrý arqyly qol jetkiziledi.
