«Qazpochta» qyzmet kórsetýdiń jańa formatyna ótti (FOTO)
ASTANA. QazAqparat - «Qazpochta» AQ Astana qalasynda klıentterge qyzmet kórsetý qaǵıdaty ózgergen, jańǵyrtylǵan Ortalyq bólimsheniń ashylǵany týraly habarlaıdy, dep habarlady ulttyq poshta operatorynyń baspasóz qyzmetinen.
Ashylý kúni klıentterge otandyq kıno jáne televızııa juldyzdary qyzmet kórsetti. Daýt Shaıhıslamov elektrondyq kezektiń talondaryn tarata otyryp, klıentterge kómek kórsetti, al Anýar Nurpeıisov sálemdemeler sýpermarketinde operatordyń rolin somdady.
«Búgingi kúni elimizde 100-ge jýyq bólimshe jańǵyrtyldy nemese ishinara jańartyldy, Astana qalasynda qazirdiń ózinde klıentter arasynda ózin tanytyp úlgergen ári óziniń tıimdiligin dáleldegen 2 sýpermarket ashyldy. Qyzmet kórsetýdiń bul formaty elimizdiń búkil óńirinde engiziletin bolady. Búgin biz klıentterimizge servısti jáne qyzmetterdi usynýdaǵy jedeldilikti aıtarlyqtaı arttyrýǵa múmkindik beretin, jańa kóp fýnktsıonaldy bólimsheni tanystyrdyq», - dedi «Qazpochta» AQ baspasóz qyzmetiniń basshysy Baıram Azızov.
Sonymen qatar, Astana q. jańartylǵan Ortalyq bólimshe endi klıentter úshin birneshe zaldarǵa bólingen: poshtalyq jáne qarjylyq qyzmetter boıynsha jeke tulǵalarǵa arnalǵan operatsııalyq zaldar, korporatıvtik klıentterge qyzmet kórsetý orny, sálemdemeler sýpermarketi, ózine-ózi qyzmet kórsetý orny jáne aıyrbastaý pýnkti.
Poshtalyq jáne qarjylyq qyzmetter boıynsha jeke tulǵalarǵa arnalǵan operatsııalyq zaldar aptasyna 7 kún, jumys kúnderi saǵat 08:00-den 19:00-ge deıin, senbi kúni - saǵat 09:00-den 18:00-ge deıin, al jeksenbi kúni saǵat 10:00-den 15:00-ge deıin jumys isteıtin bolady.
Ortalyq zalda klıentterge qyzmet kórsetý formaty, ishinara, yńǵaısyz kabınalardyń ornyna - sálemdemeler sýpermarketine almastyrylǵan.
Osy format qazirdiń ózinde ózin tanyta bildi. Ol kompanııanyń óndiristik shyǵystaryn aıtarlyqtaı qysqartýǵa, personalǵa jáne qosymsha alańǵa qarajatty jumsamaı ótkizý múmkindigin arttyrýǵa, al klıent úshin - sálemdemeni jiberýge jáne alýǵa arnalǵan ýaqytty aıtarlyqtaı azaıtýǵa múmkindik beredi.
* * * * *
«Qazpochta» AQ - poshtalyq, qarjylyq jáne logıstıkalyq qyzmetterdi usynatyn, Qazaqstan Respýblıkasynyń ulttyq poshta operatory. «Qazpochta» AQ dúnıejúzilik poshta odaǵyna múshe, PostEurop eýropalyq poshta operatorlary qaýymdastyǵynyń múshesi, VISA International jáne MasterCard Worldwide halyqaralyq tólem júıeleriniń qaǵıdatty qatysýshysy bolyp tabylady. Kompanııanyń jalǵyz aktsıoneri «Samuryq-Qazyna» AQ bolyp tabylady.
