Qazpochta keńse taýarlaryn aýyldyq jerlerge jetkizýmen aınalysady
ASTANA. QazAqparat - «Qazpochta» AQ aýyldyq jerlerge «ABDI KOMPANI» AQ-men birlesip keńse taýarlaryn jetkizý jobasyn engizgeni jaıly habarlaıdy.
Elimizdiń barlyq poshta bólimshelerinde, sonyń ishinde aýyldyq jerlerde, «ABDI» kompanııasynyń katalogtary boıynsha mektep oqýshylary men stýdentter, bilim berý mekemelerinde jáne keńselerde jumys isteıtin qyzmetkerler keńse taýarlaryn satyp alý úshin tapsyrys bere alady, dep habarlady «Qazpochta» baspasóz qyzmeti.
«Endi aýyl men aýdan ortalyqtary turǵyndarynyń álemdik óndirýshilerdiń keńse taýarlaryn satyp alý úshin qalaǵa barý qajeti joq. Qazpochta bólimshelerindegi «ABDI» katalogtary boıynsha, 4000 teńgeden kem emes kólemde keńse jabdyqtaryna tapsyrys berýge bolady. Sonymen qatar, bul qyzmet onlaın rejımde www.postmarket.kz saıtynda qoldanysqa engizilgen. Bir aıdan keıin oqý jyly bastalady, al osy múmkindikti paıdalana otyryp, qazaqstandyqtar otbasy bıýdjetin únemdeı alady» - dedi «Qazpochta» AQ baspasóz qyzmetiniń basshysy Baıram Azızov.
Qazpochta bólimshelerindegi «ABDI» katalogtary men www.postmarket.kz saıtyndaǵy katalogtar birkelki jáne assortımentteri 200-den astam túrli taýarlardy qamtıdy.
«Qazpochta» AQ - pochtalyq, qarjylyq jáne logıstıkalyq qyzmetterdi usynatyn Qazaqstan Respýblıkasynyń ulttyq pochta operatory. Dúnıejúzilik pochta odaǵynyń múshesi, VISA International jáne MasterCard Worldwide halyqaralyq tólem júıeleriniń qatysýshysy. «Samuryq-Qazyna» AQ kompanııanyń jalǵyz aktsıoneri bolyp tabylady.
