«Qazpochta» 20 jyldyq mereıtoıyna oraı jańa merekelik markany aınalymǵa shyǵardy
ASTANA. 9 qazan. QazAqparat - Qazaqstan poshta baılanysynyń ulttyq operatory «Qazpochta» AQ «Eskertkish, mereıtoılyq datalar jáne merekeler» serııasymen kompanııanyń 20 jyldyǵyna arnalǵan jańa markany aınalymǵa shyǵardy. Markany tanystyrýdyń saltanatty jıynyna QR Kólik jáne kommýnıkatsııa vıtse-mınıstri Sáken Sarsenov qatysty.
Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
Merekelik poshtalyq toptamanyń shyǵarylymy Dúnıejúzilik poshta kúnine arnalyp otyr. Qazaqstannyń poshtalyq ákimshiligi - 1992 jyldan bastap Búkilálemdik poshta odaǵynyń múshesi. Al 2012 jyly Búkilálemdik poshta odaǵynyń Doha qalasynda (Katar) ótken 25 kongresinde «Qazpochta» AQ-nyń fılatelııalyq toptamasy álemdegi eń úzdik toptamalardyń biri retinde tanyldy.
Qurylǵanyna 20 jyl bolǵan «Qazpochta» AQ-nyń qurylymynda búgingi kúni 17 myńnan astam qyzmetker qyzmet etse, poshta baılanysy bólimderiniń sany 2,5 myńǵa jýyqtady. Kompanııa 6 myń eldimekenge qyzmet kórsetedi.
«Qazpochta» - eń qajetti jáne kópshilik suranysyna ıe qyzmetterdi usynatyn áleýmettik baǵdarlanǵan kompanııalardyń biri, -d ep atap ótti QR Kólik jáne kommýnıkatsııa vıtse-mınıstri Sáken Sarsenov. - Bıylǵy jyly «Qazpochta» Halyqqa qyzmet kórsetý ortalyqtarynyń úlgisi boıynsha qyzmet kórsetý sapasyn arttyrýdyń is-sharalar josparyn qabyldady. Jaqyn ýaqytta birqatar bólimderdegi qyzmet kórsetý sapasy joǵary deńgeıde bolatynyna senimdimin».
Vıtse-mınıstr kompanııa búgingi kúni 5 aýyldyq bólimde memlekettik qyzmetti kórsetý boıynsha pılottyq jobany júzege asyryp jatqanyn aıtyp ótti.
Budan bólek, Sáken Sarsenov «Qazpochta» óziniń logıstıkalyq jelilerin belsendi túrde damyta otyryp, Qazaqstanda elektrondyq kommertsııanyń qarqyn alýyna aıtarlyqtaı úles qosady degen senimin bildirdi.
Markany tanystyrýdyń saltanatty jıynyna QR Kólik jáne kommýnıkatsııa vıtse-mınıstri Sáken Sarsenov jáne «Qazpochta» AQ Basqarma tóraǵasynyń mindetin atqarýshy Ermek Pirimbetov qatysty
