«KAZNEX INVEST» jekeshelendirý baǵdarlamasyna qatysýdy josparlap otyrǵan joq
ASTANA. QazAqparat - «KAZNEX INVEST» Eksport jáne ınvestıtsııalar jónindegi ulttyq agenttiginiń jekeshelendirý baǵdarlamasyna qatysýy josparlanyp otyrǵan joq.
Bul týraly búgin Ortalyq kommýnıkatsııalar qyzmetindegi baspasóz máslıhatynda «KAZNEX INVEST» AQ Basqarma Tóraǵasynyń orynbasary Almas Aıdarov málim etti.
«Jekeshelendirý boıynsha osyndaı josparlardy kompanııanyń ózi jekeleı júzege asyrmaıdy. Bundaı sharalar Úkimet deńgeıinde aıqyndalady, sondyqtan da men biletin málimetke qaraǵanda, ıaǵnı búginde qabyldanǵan qaýlyda «KAZNEX INVEST» qamtylmaǵan. Ázirge, bizdiń kompanııadaǵy jekeshelendirý týraly másele kóterilgen joq»,-dedi A. Aıdarov.
Aıta keteıik, QR Investıtsııalar jáne damý mınıstrliginiń «KAZNEX INVEST» eksport jáne ınvestıtsııalar ulttyq agenttigi» aktsıonerlik qoǵamy qazaqstandyq shıkizattyq emes eksportty damytý men jyljytýǵa jáne ekonomıkanyń basym sektorlaryna tikeleı sheteldik ınvestıtsııalardy tartýǵa barynsha qolaıly jaǵdaı jasaý arqyly ulttyq ekonomıkany ártaraptandyrýǵa járdemdesetin ulttyq damý ınstıtýty bolyp tabylady.
Kompanııanyń maqsaty - otandyq shıkizattyq emes eksportty damytý men jyljytýdyń jáne ekonomıkanyń basym sektorlaryna tikeleı sheteldik ınvestıtsııalardy tartýdyń ulttyq júıesiniń tıimdi qyzmet isteýine belsendi qolǵabys etý.
