Kaznedra platformasy maýsymda óndiristik paıdalanýǵa beriledi

ASTANA. QazAqparat – KAZNEDRA jer qoınaýyn paıdalanýdyń biryńǵaı platformasy osy jyldyń maýsymynda óndiristik paıdalanýǵa beriledi. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.

«Memleket basshysynyń 2022 jyldyń 14 shildesindegi Úkimettiń keńeıtilgen otyrysy qorytyndysy boıynsha bergen tapsyrmasyn oryndaý aıasynda KAZNEDRA jer qoınaýyn paıdalanýdyń biryńǵaı platformasy ázirlenip jatyr», - dep atap ótedi Úkimet basshysynyń birinshi orynbasary jaýabynda.

Onyń aıtýynsha, KAZNEDRA serverinde aqparattardy jarııalaý úshin memlekettik jáne jergilikti organdardan alynǵan derekterdi redaktsııalaý, túrlendirý jáne qurylymdaý jumystary júrgizildi. Al, «Ulttyq geologııalyq qyzmet» AQ KAZNEDRA-ǵa qaıtalama geologııalyq esepterdi tsıfrlandyrý jumysyn júrgizip jatyr. Búginde platformaǵa 30 myńnan astam esep júktelgen.

«KAZNEDRA jobasyn kezeń-kezeńmen júzege asyrý úshin jol kartasy bekitilgen. Oǵan sáıkes, platformanyń ınteraktıvti kartasy, qatty paıdaly qazbalarǵa arnalǵan lıtsenzııaǵa ótinimderdiń bıznes-protsesi syndy komponentter test rejıminde jumys istep tur. Júıeni óndiristik paıdalanýǵa engizý osy jyldyń maýsymyna josparlanyp otyr», - dedi Roman Sklıar.