«Qazmyrysh» Jáırem jumysshylar kentiniń áleýmettik damýyna 1,2 mlrd teńgeden astam qarjy quıady
ÓSKEMEN. QazAqparat - «Qazmyrysh», «Jáırem ken-baıytý kombınaty» jáne Qaraǵandy oblysynyń ákimdigi 2017 jylǵa ózara yntymaqtastyq týraly memorandýmge qol qoıdy, dep habarlaıdy «QazAqparat» HAA tilshisi.
Qazaqstan Respýblıkasy Prezıdentin tolǵandyryp otyrǵan eldiń baǵdarlamalyq qujattaryndaǵy negizgi máselelerdi sheshý úshin kompanııa Qaraǵandy oblysy Jáırem kentindegi áleýmettik jobalardy júzege asyrýǵa jalpy kólemi 1 265 076 000 (bir mıllıard eki júz alpys bes mıllıon jetpis alty myń) teńge bóldi jáne bul mindettemelerdi memorandýmda bekitti.
Sharalar kesheni kenttiń kópjyldyq máselesin sheshýge múmkindik berdi - turǵyndar úzdiksiz beriletin sý men jylýǵa qol jetkizdi. Medıtsınalyq ortalyqqa jóndeý jumystary júrgizilip, qajetti quraldarmen jabdyqtaldy. Kentte 2 saıabaq abattandyrylyp, olarǵa balalardyń oıyn kesheni ornatyldy.
«Aldaǵy josparlarǵa kelsek» -, dedi «QazAqparat» HAA tilshisine «Qazmyrysh» JShS áleýmettik máseleler boıynsha atqarýshy dırektory Andreı Lazarev, 2016 jyly «Qazmyrysh» óz qaramaǵyna alǵan barlyq nysandardy qarjylandyrýdy jalǵastyrdy, áli de jalǵasady. Jańa memorandýmda burynǵy josparlarǵa medıtsınalyq, balalar, mádenı mekemelerge qatysty aýqymdy jobalar qosyldy.
Máselen, orta bilim beretin eki mektep pen balabaqshany jóndeýge jáne abattandyrýǵa, «Gornıak» mádenıet úıin jóndeý men jabdyqtaýǵa aqsha bólindi. Jáırem aýrýhanasy mekemeni jańartýǵa, qur-jabdyqtaryn aýystyrýǵa jáne dárigerler jalaqysyn kóterýge qarjylandyrý alady. «Eýrazııa» medıtsınalyq ortalyǵyna da qarjy bólinedi.
Kompanııa bólgen qarajat esebinen jáne kompanııanyń tikeleı qatysýymen Jáırem kentinde jańa meshit qurylysy bastalady jáne 2019 jylǵa deıin paıdalanýǵa beriledi.
