«QazMunaıGazdyń» arnaıy jumys toby Jańaózen kásipkerlerimen kezdesti

JAŃAÓZEN. QazAqparat – Jańaózende «QazMunaıGaz» UK AQ (QMG) basqarma tóraǵasynyń orynbasary Dáýletjan Hasanov bastaǵan arnaıy jumys toby qaladaǵy 30-ǵa jýyq kásiporynnyń basshylarymen kezdesti, dep habarlaıdy QazAqparat QMG-saıtyna silteme jasap.

Kezdesýge «Ózenmunaıgaz» AQ bas dırektory N.Qılybaı, Jańaózen qalasynyń «Atameken» kásipkerler palatasynyń dırektory A.Sharapatdınov, jergilikti atqarýshy organ ókilderi, sondaı-aq máslıhat depýtattary qatysty.

Jańaózen aýmaǵynda birqatar taýar óndirisi men qyzmet túrlerin damytý máselesi talqylandy.

D.Hasanov atap ótkendeı, taldaý barysynda «Ózenmunaıgaz» kompanııasynyń satyp alý qyzmetinde bolashaqta otandyq óndirýshiler jetkizýine bolatyn taýar men qyzmet túrleriniń bar ekeni anyqtaldy. «Bul shara óńirdegi jumyssyzdyq máselesin sheshýge jáne jergilikti taýarlar men qyzmetterdi damytýǵa yqpal etedi», - dep atap ótti jumys tobynyń jetekshisi.

Jıynǵa qatysýshylar óńirdegi qajettilikterdi anyqtap, tıisti usynystardy qaraıtyn arnaıy shaǵyn top qurý týraly sheshim qabyldady.

«Búginde qala kásipkerleri ysyrmalardy jóndeý, shynyplastıka qubyrlaryn jóndeý, gıdravlıkalyq kiltti jalǵa alý jáne metall synyqtaryn radıatsııadan tazartý sııaqty qyzmetterdi damytý boıynsha jobalardy qolǵa alǵanyn aıta ketý kerek.

Arnaıy jumys toby jergilikti taýar men qyzmet túrleri boıynsha perspektıvaly baǵyttardy anyqtaý úshin «Ózenmunaıgaz» AQ satyp alý qyzmetin tolyq taldaý jumysyn jalǵastyrady», - delingen QMG málimetinde.

Eske salaıyq, «QazMunaıGazdyń» arnaıy jumys toby «Ózenmunaıgazda» kóptegen buzýshylyq anyqtaǵan bolatyn.

Al Bas prokýratýra «Ózenmunaıgaz» tenderleriniń zańdylyǵyn zerdeleıtinin aıtty.