Qazmunaıgazdyń munaı qory neshe jylǵa jetedi
ASTANA. KAZINFORM — «QazMunaıGaz» ulttyq kompanııasynyń dáleldengen munaı qory 785 mln tonna bolady. Bul týraly «QazMunaıGaz» UK» AQ basqarma tóraǵasy Ashat Hasenov Úkimet kýlýarynda aıtty.
Onyń sózinshe, kompanııa ózi qatysatyn árbir ken ornyn tehnıkalyq jáne ekonomıkalyq turǵydan baǵalaıdy. Al munaı qorynyń kólemin Memlekettik qorlar jónindegi komıssııa bekitedi.
— Qazir Qazmunaıgazdyń munaı qory 785 mln tonnaǵa jetip otyr. Buǵan kompanııanyń ózi basqaratyn ken oryndaryndaǵy jáne birlesken kásiporyndardaǵy qorlar kiredi. Bul — dáleldengen qor. Oǵan qosa, ken oryndaryn qosymsha barlaý jáne shıkizat qoryn tolyqtyrý jumystary úzdiksiz júrgizilip jatyr, — dedi Ashat Hasenov.
Kompanııa basshysynyń túsindirýinshe, jylyna shamamen 26 mln tonna munaı óndiriletinin eskersek, qazirgi qor matematıkalyq esep boıynsha 45 jyldan astam ýaqytqa jetedi.
— Alaıda bul 45 jyldan keıin munaı qory taýsylady degen sóz emes. Shıkizat qory únemi tolyqtyrylyp otyrady, geologııalyq barlaý jumystary jalǵasýda. Uńǵymalar burǵylap, jańa munaı aǵyndaryn anyqtaǵan soń, olardy birden qor esebine engizemiz. Bul — úzdiksiz jańaryp otyratyn protsess, — dep atap ótti ol.
Buǵan deıin Premer-mınıstrdiń birinshi orynbasary Nurlybek Nálibaev munaı-gaz salasynda shıkizatty tereń óńdeýge jáne gaz resýrstaryn tıimdi paıdalanýǵa basymdyq beriletinin aıtqan edi.
Sondaı-aq Germanııa, Koreıa, Aýstralııa mamandary Qazaqstannyń jer qoınaýyn zertteıdi.
