«QazMunaıGazdyń» enshiles kompanııasy 4,2 mlrd teńgege kólikti jalǵa almaq

Kompanııa ókilderiniń túsindirýinshe, satyp alý týraly málimetke sáıkes, tender úsh lotqa bólingen. Áleýetti jetkizýshilerden ótinim 16 qarashaǵa deıin qabyldanady.

Kompanııa Kazinform saýalyna bergen jaýabynda munaı-servıs salasynda qyzmet kórsetetinin, atap aıtqanda, uńǵymalardy salýmen, olardy kúrdeli jáne aǵymdaǵy jóndeýmen aınalysatynyn málimdedi. Sondyqtan avtopark ustaý kásiporynnyń negizgi qyzmetine jatpaıdy.

Kompanııa kólikpen qamtamasyz etýdiń birneshe nusqasyn qarastyryp, shyǵyndaryn salystyrǵan. Nátıjesinde kólikterdi uzaq merzimge jalǵa alýdy tıimdi dep tapqan. Ken oryndarynda tolyq jetekti, jol talǵamaıtyn pıkaptardy paıdalaný josparlanyp otyr.

Mundaı kólikterdi tańdaý ken oryndaryndaǵy jumys jaǵdaıyna baılanysty. Onda aptap ystyqta, qumdy daýyl kezinde, jol tóselmegen, topyraǵy sortań jerlerde júrýge týra keledi. Kompanııanyń málimetinshe, mundaı jaǵdaıda kólik tez tozyp, quny tómendeıdi.

OSC ókilderiniń aıtýynsha, avtokólik satyp alǵan jaǵdaıda ony kútip ustaýǵa, jóndeýge, jańartýǵa, keıin kádege jaratýǵa qosymsha qarajat qajet. Buǵan qosa, júrgizýshilerdi, mehanıkter men dıspetcherlerdi jumysqa qabyldap, kólik jóndeýge qajetti ınfraqurylym qurýǵa týra keledi.

Keshendi kólik qyzmeti avtokólikti jalǵa alý men júrgizýshiniń qyzmetimen shektelmeıdi. Oǵan tehnıkalyq qyzmet kórsetý, janar-jaǵarmaımen qamtamasyz etý, kólikterdi jóndeý, isten shyqqan avtokólikterdi aýystyrý, saqtandyrý, salyqtar men basqa da mindetti tólemderdi tóleý kiredi.

Kompanııanyń pikirinshe, kólikterdi jalǵa alý óz avtoparkin ustaýǵa ketetin shyǵyndardy boldyrmaýǵa, negizgi óndiristik qyzmetke den qoıýǵa múmkindik beredi.

Tender ashyq túrde ótkizilip jatyr. Áleýetti jetkizýshilerge qoıylatyn talaptar satyp alý portalynda jarııalanǵan.

Buǵan deıin Qazaqstanda 2035 jylǵa deıin jańa munaı-gaz ken oryndaryn ıgerý jospary qabyldanǵanyn jazǵan edik.