«QazMunaıGaz» JQS kompanııasy alaıaqtyq jóninde eskertý jarııalady

ASTANA. QazAqparat - «QazMunaıGaz» janarmaı quıý stansalarynyń jelisi alaıaqtyq jóninde eskertedi. Bul týraly «QazMunaıGazÓnimderi» JShS qoǵammen baılanys jónindegi bólimi málim etti, dep habarlaıdy QazAqparat tilshisi.

Taıaýda messendjerler men áleýmettik jelilerde «QazMunaıGaz» JQS jelisi óziniń 10 jyldyq mereıtoıyna baılanysty 1 000 lıtr benzınniń kýponyn syılyqqa berip jatyr» degen jalǵan aqparat tarady. Kýpondy alý úshin alaıaqtar áldebir kúdikti saıtqa kirip, saýalnamany toltyrýdy usynady.

«QazMunaıGaz» janarmaı quıý stansalarynyń jelisi bul habarlama shyndyqqa sáıkes kelmeıtindigin, alaıaqtyq jáne adamnyń jeke málimetteri men qupııa aqparattary ıemdenýdi kózdeýi yqtımal ekendigin eskertedi.

«Qurmetti klıentter! Ótinemiz, barynsha muqııat bolyńyzdar! Alaıaqtardyń áreketine aldanyp qalmańyzdar! Bizdiń kompanııanyń atyn jamylyp, bógde saıttarda oınatylyp jatqan oıyndarǵa qatyspańyzdar! Kompanııa uıymdastyrǵan qoldanystaǵy aktsııalar men oıyndar týraly barlyq aqparat tek azskmg.kz saıtynda jáne kompanııanyń áleýmettik jelilerdegi resmı paraqshalarynda ǵana jarııalanady», - delingen habarlamada.