«QazMunaıGaz» Jezqazǵanǵa benzındi 5-6 kúnde jetkizýge ýáde etti
ASTANA. QazAqparat - Qaraǵandy oblysynyń ákimi Erlan Qoshanovqa aımaqta janar-jaǵarmaı tapshylyǵy máselesi qalaı sheshilip jatqandyǵy baıandaldy, dep habarlaıdy QazAqparat.
Ótken aptada Jezqazǵan qalasynyń turǵyndary kólikterine 20 lıtr benzın quıý úshin birneshe saǵat boıy kezekte turýǵa májbúr bolǵany málim boldy - bir qolǵa odan artyq suıyq otyn berilmedi.
«22 qyrkúıekte Jezqazǵanda janar-jaǵarmaı qory boldy. AI 80 qory bes kúnge jetkilikti bolǵan, AI 92 jáne AI 95 - 12 kúnge, al dızeldik otyn 11 kúnge jetkilikti edi», - dep málimdedi aımaq basshysynyń orynbasary Almas Aıdarov apparattyq jınalysta. 
Jezqazǵannyń ákimi Batyrlan Ahmetovtiń aıtýynsha, qazirgi tańda benzınge qatysty másele jaqsardy: uzyn sonar kezek joq, suıyq otyndy «Helios» JJQS jelisinen erkin satyp alýǵa bolady. Munaı óniminiń satylymyna shekteý tek «QazMunaıGaz» janarmaı quıý stantsııalary jelisinde ǵana ornatylǵan.
Sonymen qatar Jańaarqa jáne Ulytaý aýdandarynyń turǵyndary da suıyq otynnyń tapshylyǵyna shaǵymdanǵan bolatyn.
«Nege munshalyqty nashar jumys istep jatyrsyzdar?», - dedi Erlan Qoshanov «QazMunaıGaz ónimderi» fılıalynyń dırektory Qanat Aqylbekovke qarata.
«Qazir jaǵdaı túzetilip keledi. 451 tonna - AI 80, 845 tonna - AI 92, 260 tonna - AI 95 jáne 2015 tonna dızeldik otyn jetkizilgeli jatyr. Jetkizý 5-6 kúnge sozylady, osy ýaqyt kúte turý kerek bolady», - dep jaýap berdi ol.
Oblys ákimi birinshi kezekte aımaqtaǵy benzın tapshylyǵyn joıýdy tapsyrdy.
Apparattyq jınalysta aıtylǵandaı, Atyraý munaı óńdeý zaýytynda jóndeý jumystary júrgizilgendikten osyndaı defıtsıt oryn alǵan bolatyn. Endi zaýyt iske qosylyp, jumysyn qaıta bastady. Pavlodar munaı óńdeý zaýyty da jóndeý jumystaryn ótkizý úshin ýaqytsha jabylǵan. Suıyq otyn mólsheri tómendegendikten naryqta AI 92-93 benzıni shamamen 2,6 %-ǵa qymbattaǵan.
