«QazMunaıGaz» Japonııanyń Halyqaralyq yntymaqtastyq bankinen tartylǵan 145 mln. dollar qaryzdy merziminen buryn ótedi

Bul týraly búgin Astanadaǵy baspasóz máslıhatynda «QazMunaıGaz» kompanııasynyń Munaı óńdeý jáne marketıng jónindegi basqarýshy dırektory Danııar Tıesov málim etti, dep habarlaıdy QazAqparat.

«Atyraý munaı óńdeý zaýytynyń jańǵyrtýdyń kelesi kezeńin iske asyrý jáne oǵan aıtarlyqtaı qarajat tartý úshin «QazMunaıGaz» kompanııasy jaqynda ony jańǵyrtýǵa buryndary tartylǵan búkil nesıeler boıynsha esep-qısap júrgizý jóninde sheshim qabyldady. Men bul jańalyqty alǵash ret habarlap otyrmyn», dedi baspasóz máslıhatynda D. Tıesov.

Onyń sózine qaraǵanda, Atyraý munaı óńdeý zaýytyn jańǵyrtýdyń birinshi kezeńi Qazaqstannyń memlekettik kepildemesimen Japonııanyń Halyqaralyq yntymaqtastyq bankiniń nesıesin tarta otyryp japondyq kompanııalardyń qatysýymen 2003-2006 jyldary iske asyrylǵan. Nesıe 2006 jyly tolyǵymen ıgerilgen. Sodan keıin qaryzdy óteý bastalǵan. «Qaryz japon valıýtasy - ıenmen tartylǵanyn jáne ıenniń baǵamy ylǵı da ózgerip otyratynyn eskere otyryp, qazirgi ýaqytta 145 mln. dollary merziminen buryn ótelgenin aıta alamyn», dedi ol. Onyń aıtýynsha, qaryz negizinen 2014 jyly ótelýi tıis bolatyn jáne ekvıvalentte onyń jalpy somasy 235 mln. dollardy quraǵan.