«QazMunaıGaz» jáne reseılik «Transneft» kompanııalary munaı tasymaldaý máselelerin talqylady
Kezdesý barysynda ataýly jobanyń Qazaqstan men Reseı úshin óte mańyzdy ekenine mán berildi. Bul rette Maǵzum Myrzaǵalıev «Transneft» kompanııasynyń Qazaqstanda óndirilgen munaıdy jetkizý men tranzıt arqyly tasymaldaýda uzaq merzimdi ári senimdi seriktes ekenin atap ótti.
Taraptar Kaspıı qubyr konsortsıýmy teńiz termınalyndaǵy qazirgi jaǵdaıǵa erekshe nazar aýdardy. Qazir munda birinshi jáne ekinshi aılaq qurylǵylary mańyndaǵy jarylý qaýpi zor zattardy mınasyzdandyrý boıynsha jumystar atqarylyp jatyr.
Reseıdiń Tótenshe jaǵdaılar mınıstrligi bul jumysty 15 maýsymda bastaǵan bolatyn. Atap aıtqanda, sala mamandary sý astynda qaýipti bolýy múmkin zattardy tereńinen zertteý jáne olardy joıý boıynsha sharalardy qolǵa aldy. Bastapqyda belgilengen is-sharalardy 25 maýsymda aıaqtaý josparlanǵan edi. Alaıda aýa raıynyń qolaısyzdyǵyna baılanysty mınasyzdandyrý jumystary 5 shildege deıin shegerildi. Bul ýaqytta úshinshi aılaq shtattyq rejımdegi jumysyn jalǵastyra beredi.
Basqosý barysynda baıandalǵandaı, ekinshi aılaq aýmaǵyndaǵy sharalar aıaqtalýǵa jaqyn. 1 shildeden bastap qubyr jelisi eki aılaqty qoldaný arqyly jumys isteıtin bolady. Al birinshi jyljymaly aımaq akvatorııasyndaǵy qaýipti zattardy izdeý men olardy shyǵarý 5 shildede aıaqtalýy kerek.
«QazMunaıGaz» ben «Transneft» kompanııalarynyń basshylyǵy osyndaı jaǵdaıǵa qaramastan, Kaspıı qubyr konsortsıýmy júk jóneltý kestesine sáıkes qazaqstandyq munaıdy esh irkilissiz tıegenin atap ótti.
Maǵzum Myrzaǵalıev pen Nıkolaı Tokarev eki aılaqty mınasyzdandyrý barysyn talqylaı kele, jumystar ýaqytyly aıaqtalaryna senim bildirdi jáne úsh aılaqtyń barlyǵynyń turaqty jumys isteýi mańyzdy ekenine basa mán berdi.
Eki tarap kompanııalar arasyndaǵy qarym-qatynastyń barlyq baǵytta júıeli jalǵasyp jatqanyn alǵa tartyp, áriptester ózara túsiniktik aıasynda birlesken isti atqaryp otyrǵanyn málimdedi.
Foto: kmg.kz
