QazMunaıGaz jáne LanzaJet Qazaqstanda avıatsııalyq otyn óndiretin zaýyt salady
NЬıÝ-IORK. KAZINFORM – «QazMunaıGaz» UK AQ Basqarma tóraǵasy Ashat Hasenov pen amerıkalyq LanzaJet tehnologııalyq kompanııasynyń bas atqarýshy dırektory Djımmı Samartsıs Qazaqstanda turaqty avıatsııalyq otyn óndiretin zaýyt salý boıynsha negizdemelik kelisimge qol qoıdy.
Taraptar Qazaqstanda turaqty avıatsııalyq otyn óndiretin (SAF) zaýyt salý boıynsha aıaqtalǵan tehnıkalyq-ekonomıkalyq negizdemeniń (TEN) nátıjelerin jáne aldaǵy is-sharalardy qarastyrdy. Kezdesý qorytyndysy boıynsha QMG men LanzaJet arasynda Negizdemelik kelisimge qol qoıyldy.
Qujat TEN nátıjelerin resmı túrde bekitti. Endi jańa kezeń — naqty jobalaý (FEED) bastalady. Bul kezeń aıasynda zaýyt qurylysy úshin barlyq tehnıkalyq jáne ekonomıkalyq sheshimder ázirlenedi. Budan buryn naryqqa júrgizilgen taldaý kórsetkendeı, 2030 jylǵa qaraı Qazaqstanda SAF tutyný kólemi jylyna 70 myń tonnaǵa jetýi múmkin.
— Birlesken jumys ekijaqty yntymaqtastyqty nyǵaıtýǵa eleýli úles qosyp, tómen kómirtekti damý maqsattaryna jetýde jáne jańa tehnologııalardy engizýge yqpal etetin bolady. Jalpy, bul joba bıologııalyq otyn naryǵynyń damýyna, avıatsııanyń ekologııalyq parametrlerin jáne elimizdiń tranzıttik áleýetin jaqsartýǵa oń áserin tıgizbek, — dep atap ótti Ashat Hasenov.
Aıta keteıik, SAF (Sustainable Aviation Fuel) — munaımen baılanysty emes jańartylatyn resýrstardan óndiriletin ekologııalyq taza avıaotyn. Ony dástúrli Jet A-1 avıakerosınge qosyp paıdalaný nátıjesinde parnık gazdarynyń shyǵaryndysyn 95% deıin azaıtýǵa múmkindik beredi.
LanzaJet, Inc. — «alcohol-to-jet» tásili boıynsha etanoldan SAF óndirý tehnologııalary salasyndaǵy álemdik kóshbasshy kompanııa. Kompanııanyń tehnologııasy AQSh Energetıka mınıstrliginiń Tynyq muhıty soltústik-batys ulttyq zerthanasymen birlesip jasalǵan. LanzaJet álemniń eń iri All Nippon Airways, British Airways jáne Virgin Atlantic syndy avıakompanııalarmen SAF jetkizý boıynsha uzaqmerzimdi kelisimder jasasqan.
Eske salsaq, Prezıdent atynan sala ardagerlerine jáne QazMunaıGaz kompanııalar toby qyzmetkerlerine memlekettik nagradalar tabys etildi.