QazMunaıGaz jáne Chevron Phillips polıetılen óndirisi zaýytyn jobalaýdy bastaý týraly kelisimge qol qoıdy
Júzdesý barysynda taraptar «Atyraý oblysynda ıntegratsııalanǵan gaz-hımııa kesheniniń qurylysy – ekinshi faza (polıetılen)» jobasyn júzege asyrý úshin Lıtsenzııalyq kelisim men Jobalaý týraly shartqa qol qoıdy.
Atalǵan shartqa sáıkes MarTECH® ADL tehnologııasy boıynsha polıetılen óndiretin qondyrǵyǵa arnalǵan jobalaý qujattamasy ázirlenbek. Sonymen qatar, jylyna 625 myń tonna polıetılen óndirý úshin tıisti lıtsenzııa beriledi.
Chevron Phillips Chemical kompanııasynyń tehnologııasy bolashaqta qazaqstandyq zaýytta kóptegen ónim túrlerin, sonyń ishinde tyǵyzdyǵy joǵary premıým surypty polıetılen shyǵarýǵa múmkindik beredi. Boljam boıynsha, ónimniń bul túri aldaǵy ýaqytta álemdik naryqta turaqty ári uzaqmerzimdi suranysqa ıe bolady.
Oǵan qosa, jylyna 625 myń tonna polıetılen shyǵarýǵa qaýqarly ekinshi polımerleý qondyrǵysy boıynsha basqa lıtsenzıarmen kelissózder aıaqtalýǵa jaqyn. Oǵan osy jyldyń jeltoqsan aıynyń ortasyna deıin qol qoıylady degen jospar bar.
Osylaısha, eki tehnologııalyq qondyrǵynyń jalpy qýattylyǵy 1 mln 250 myń tonnany qurap, biryńǵaı keshen bolyp biriktiriledi. Eki jetekshi lıtsenzıardy tańdaý polıetılenniń kóptegen negizgi jáne premıým túrlerin shyǵarýǵa, sonymen qatar óndiris pen básekelestiktiń asa ıkemdi bolýyna serpin berýi tıis.
«Biz Chevron Phillips Chemical kompanııasymen aradaǵy yntymaqtastyqty joǵary baǵalaımyz. Polıetılen óndirý jobasy boıynsha Chevron Phillips Chemical kompanııasymen polıetılen óndirý tehnologııasynyń eń ońtaıly konfıgýratsııasy boıynsha kelisimge kelgenimizge qýanyshtymyn. Osy jumys aıasynda CPChem aǵymdaǵy jáne bolashaq naryq tendentsııalaryna saı sıpattamalary bar, sonyń ishinde premıým sapaly polıetılen óndirip shyǵarýdy kózdeıtin tehnologııany usyndy», - dedi kezdesý barysynda M. Myrzaǵalıev.
Taraptar Lıtsenzııalyq kelisim men Jobalaý týraly shartyna qol qoıyp, bazalyq jobany ázirleýge kirisedi. Maǵzum Myrzaǵalıev muny eki jaqtyń tabysty jumysynyń alǵashqy nátıjesine balady. Osy qujattarǵa qol qoıý arqyly Qazaqstan Respýblıkasynda aýqymdy «Polıetılen» jobasynyń júzege asyrylýyna jol ashylatynyn da atap ótti.
Shara aıasynda munaı-gaz hımııasy salasyndaǵy amerıkalyq seriktesterimen ekijaqty yntymaqtastyqty odan ári keńeıtý máseleleri talqylandy.
Aıta keteıik, Chevron Phillips Chemical Company, LLC – shtab-páteri Tehas shtatynda, Výdlendste ornalasqan munaı-hımııa kompanııasy. Etılen, propılen, polıetılen, polıolefın, hosh ıisti qospalardy jáne basqa da hımııa zattaryn shyǵaratyn iri kásiporyn.
