«QazMunaıGaz» janarmaı quıý stansalarynyń jelisin satty

NUR-SULTAN. QazAqparat - «QazMunaıGaz» UK» AQ janarmaı quıý stansalar jelisin ıelik etken «QMG-Retail» JShS kompanııasyndaǵy 100 paıyzdyq úlesin 60,5 mlrd teńgege satty, dep habarlaıdy QazAqparat kompanııanyń baspasóz qyzmetine silteme jasap.

2018 jylǵy 12 jeltoqsanda memlekettik múlik tizilimi veb-portalynyń saıtynda «QMG-Retail» JShS-in satý boıynsha elektrondyq saýda-sattyq ótti. Saýda-sattyq, oǵan qatysqan kompanııalar, onyń jeńimpazy týraly aqparat www.gosreestr.kz saıtynda jarııalanǵan.

2019 jyldyń 8 aqpanynda konkýrs jeńimpazy «Petro-Retail» JShS men «QMG-Retail» JShS-niń 100 paıyzdyq úlesin satyp alý-satý sharty jasaldy.

Osy jyldyń 1 sáýirinen bastap QMG enshiles kompanııasy «QazMunaıGaz Ónimderi» JShS men «QMG-Retail» JShS arasyndaǵy janarmaı quıý stansalaryn jalǵa alý jáne paıdalaný týraly kelisimshart kúshin joıdy. Sáıkesinshe, 2019 jyldyń 1 sáýirinen bastap janarmaı quıý stansalarynyń jumysyn júrgizý «Petro-Retail» JShS-ne ótti .

Aktıvti satý kezinde jańa ıelenýshige qyzmetkerlerdiń jumys ornyn saqtap qalý talaby qoıyldy. Oǵan sáıkes, jańa menshik ıesi QMGÓ jáne onyń fılıaldarynyń óndiristik personalyn túgeldeı qazirgi shartpen keminde alty aıǵa jumysqa qabyldaýy kerek.

Sondaı-aq, baıqaý talaby men satyp alý-satý shartynda kórsetilgendeı, «QazMunaıGaz» JMQS jelisiniń saýdalyq ataýy 2019 jyldyń sońyna deıin qoldanysta bolady.

«QMG-Retail» JShS-in satý yellow pages qaǵıdattaryna saı kvazımemlekettik sektor úlesin azaıtý jónindegi QMG josparlarymen baılanysty, sondaı-aq QMG-nyń damý strategııasyna sáıkes keledi.