«QazMunaıGaz» ulttyq kompanııasynyń ókilderi mamandaryn arnaıy attestatsııadan ótkizbek
ASTANA. Qańtardyń 27-si. QazAqparat /Aıdar Ospanalıev/ - «QazMunaıGaz» ulttyq kompanııasynyń ókilderi kadrlardyń biliktiligin tekserý maqsatynda aǵymdaǵy jylǵy aqpan aıynyń 1-inen bastap, osy aıdyń 25-ine deıingi aralyqta kompanııa qyzmetkerleriniń barlyǵyn arnaıy attestatsııadan ótkizbek,
dep habarlaıdy QazAqparat.
Kompanııanyń baspasóz qyzmeti taratqan málimetterge qaraǵanda, ótken 2009 jyly kompanııa basshylyǵy 919 qyzmetkerdi qysqartqan. Olardyń arasynda 47 adam kompanııanyń birlesken ortalyǵynan qysqartylyp otyr. Al qurylymdyq bólimsheler 42 adamnan 36-ǵa deıin azaıdy. Sondaı-aq basqarýshylar 8-den 6-ǵa deıin kemidi. Buǵan qosa 2008-2009 jyldar aralyǵynda kompanııa jetekshilerine tólenetin bonýstar qysqartyldy. Qazirgi tańda ulttyq kompanııadaǵy bos oryndarǵa qyzmetke keletin kadrlarǵa qoıylatyn talaptar kúsheıtilip otyr. Kompanııadaǵy bos oryndar jónindegi málimetter www.kmg.kz saıty men respýblıkalyq buqaralyq aqparat quraldarynda jarııalanady. Bul - «QazMunaıGaz» kompanııasynyń enshiles kompanııalarynyń barlyǵyna da qoıylyp otyrǵan talaptar.
