«QazMunaıGaz» Ulttyq kompanııasynyń demeýshilik qoldaýymen «Astana» vaterpol klýbynyń ardagerleri álem chempıonatyna qatysady
ASTANA. Shildeniń 26-sy. QazAqparat - «Astana» vaterpol klýbynyń ardagerleri shildeniń 27-si men tamyzdyń 7-si aralyǵynda Shvetsııanyń Geteborg qalasynda sý sporty túrleri boıynsha ótetin álem chempıonatyna qatysatyn boldy. Olar bul múmkindikke «QazMunaıGaz» Ulttyq kompanııasynyń demeýshilik qoldaýynyń arqasynda ıe bolyp otyr,
dep habarlaıdy QazAqparat.
Komanda 1995 jyly qurylǵan, 1996 jyldan bastap demeýshilik kómektiń arqasynda Halyqaralyq sport komıteti jáne sý sporty túrleriniń Halyqaralyq federatsııasy uıymdastyratyn álemdik birinshilikterge belsendi túrde qatysyp keledi. Atap aıtqanda, 2008 jyly komanda Pert (Avstralııa) qalasynda ótken álem chempıonatynyń 40 jastan asqandardyń sanatynda - kúmis júldeger, 2009 jyly Sıdneı (Avstralııa) qalasynda ardagerler arasynda ótken olımpıadada - chempıon atandy.
Komanda quramynda Qazaqstan Respýblıkasyna eńbegi sińgen 4 sport sheberi (Nurlan Meńdiǵalıev, Asqar Orazalınov, Sergeı Drozdov, Sergeı Sevostıanov), 5 halyqaralyq sport sheberi (Aleksandr Polýhın, Vıktor Salnıchenko, Konstantın Chernov, Andreı Belofastov, Sergeı Drozdov), taǵy basqa 10 sport sheberi oınaıdy.
«Negizinde komanda 80 jyldardyń sońy - 90 jyldardyń basyndaǵy KSRO-nyń sý doby chempıonattary men kýbogynyń 3 márte kúmis jáne 2 ret qola júldegeri atanǵan jáne kóp jyldar boıy KSRO - nyń eń myqty komandalar úshtigine engen áıgili «Dınamo - Almaty» sý doby komandasynda oınaǵan sportshylardan jasaqtalǵan», - deıdi komanda sportshylarynyń biri Asqar Orazalınov.
Vaterpol klýbynyń ardagerleri ár jyldary olımpıada oıyndarynda, álem chempıonattarynda jáne ýnıversıadalarda Ulttyq quramda, al 2000 jyly Qazaqstan Respýblıkasy Ulttyq quramasynyń quramynda Bangkoktaǵy(Taıland) Azııalyq chempıondar Kýbogynyń ıegerleri boldy.
Komanda osynaý sport túri boıynsha Orta Azııadaǵy biregeı komanda bolyp tabylady.
