«QazMunaıGaz» ulttyq kompanııasynda kadr biliktiligin baqylaý jóninde arnaıy komıssııa quryldy
ASTANA. Qańtardyń 27-si. QazAqparat /Aıdar Ospanalıev/ - «QazMunaıGaz» ulttyq kompanııasy tekseris kezinde anyqtalǵan kadrlyq saıasattaǵy zań buzýshylyqty joıý maqsatynda ujymdaǵy qyzmetkerlerdiń basqarý tıimdiligin baqylaý jóninde arnaıy jumys tobyn qurdy,
dep habarlaıdy QazAqparat.
Sonymen qatar ulttyq kompanııa «Samuryq-Qazyna» ál-aýqat qorymen birlese otyryp, jumys babynda oryn alǵan kemshilikterdi joıý úshin arnaıy usynystar men sharalar daıyndady, olardyń oryndalýy kompanııa basshysy Qaıyrgeldi Qabyldınniń baqylaýynda bolady.
Osy máselege baılanysty ulttyq kompanııa basshysy «kadrlyq saıasatty qalyptastyrý jáne birlesken basqarý sharalaryna Memleket basshysynyń jeke nazar aýdarýy «QazMunaıGaz» kompanııasynyń memleket ekonomıkasynda erekshe oryn alatynyn kórsetedi jáne sol saladaǵy jumysty jetildirýge mindetteıdi. Munaı-gaz salasyndaǵy strategııalyq jobalardyń nátıjeliligi kóbine ondaǵy mamandardyń biliktiligine baılanysty. Sondyqtan kompanııa basshylyǵy biliktiligi joǵary kadrlyq resýrstardy tartýdy basty maqsat etýi tıis», - dep atap kórsetti.
Onyń sózine qaraǵanda, ulttyq kompanııada kadrlyq saıasattyń talapqa saı oryndalmaýy nemese tıisti erejelerdiń saqtalmaýy anyqtalǵan jaǵdaıda mindetti túrde tıisti tártiptik sharalar qolǵa alynady.
