«QazMunaıGaz» Ulttyq kompanııasy Óriktaý jobasy boıynsha qoǵamdyq tyńdaý ótkizdi
ASTANA. Qazannyń 30-y. QazAqparat - Óriktaý ken ornyndaǵy munaıly jıekteý jáne gaz-kondensat kenin tájirıbelik-óndiristik paıdalaný jobasyna arnalǵan Qorshaǵan ortaǵa áserin baǵalaý jobasy (odan ári - QOÁB) boıynsha keshe Aqtóbe qalasynda qoǵamdyq tyńdaý ótkizildi.
Kompanııa baspasóz qyzmetiniń atap ótýinshe, jıynǵa jergilikti atqarýshy jáne bılik organdarynyń, «QazMunaıGaz» UK AQ, Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasynyń, qoǵamdyq uıymdardyń ókilderi, ardagerler jáne basqalar qatysqan.
«Óriktaý ken ornyndaǵy munaıly jıekteý jáne gaz-kondensat kenin tájirıbelik-óndiristik paıdalaný jobasyn» «QazǴZMImunaıgaz» AQ jobalaý ınstıtýty, al QOÁB jobasyn «Olympex Advisers» mamandary ázirledi. Usynylǵan jobada Óriktaý ken ornyn tájirıbelik-óndiristik paıdalanýdyń (TÓP) qorshaǵan ortaǵa yqtımal áseri qaralady. Sonymen qatar jumysta qorshaǵan ortaǵa operatordyń sharýashylyq qyzmetiniń saldaryn meılinshe azaıtý jónindegi is-sharalar jospary qamtylǵan.
Tájirıbelik-óndiristik ıgerý úrdisinde gaz-kondensat kenin sarqylý rejiminde óndirý úshin 8 jáne munaıly jıekteý úshin qabatty qysymdy qoldaý rejiminde jumys isteıtin taǵy da 8 paıdalaný uńǵymalaryn jaratý boljanyp otyr. Munaıdy óndirý kezinde sońǵy eki uńǵymalardy qabatty qysymdy qoldaý rejimine aýystyrý josparlanýda. Tájirıbelik-óndiristik ıgerýdiń úshinshi jylynda gazdy óndirý kólemin - 997mln.tekshe metrge deıin jetkizý kózdelýde, gaz-kondensatyn óndirý 268 myń tonnany quraıtyn bolady, al munaı óndirý kólemi ken ornyn paıdalanýdyń besinshi jylynda 44,5 myń tonna bolady dep josparlanýda.
Óriktaý ken orynynda tájirıbelik-óndiristik paıdalaný kezeńinde qorshaǵan ortaǵa óndiristik jumystardyń áserin baǵalaýdyń eki táýelsiz ádisteri boıynsha salystyrmaly nátıjeler alynǵan bolatyn.
«Óriktaý Opereıtıng» JShS barlyq jumystardy QR tabıǵatty qorǵaý zańnamasyna sáıkes oryndaýǵa mindettenedi. Operator óndiristik qyzmetkerler men jergilikti halyqty áleýmettik qorǵaýdy júzege asyrýǵa nıetti.
Óriktaý gaz-kondensatty ken ornyn ıgerý Qazaqstan Respýblıkasynyń ońtústik óńirlerin gazben qamtýǵa arnalǵan áleýmettik joba bolyp tabylady jáne «Beıneý-Bozoı-Aqbulaq» magıstraldy gaz qubyry qurylysynyń jobasyn iske asyrýdyń bir býyny bolyp tabylady.
Atalǵan jobany iske asyrý Qazaqstan Respýblıkasynyń ishki naryǵyn molaıtý úshin kómirsýtek óndirý kólemin ósirýge múmkindik beredi.
Aıta keteıik, Óriktaý munaı-gaz ken orny 1983 jyly ashylǵan. Munaıgazkondensatty ken orynnyń kómirsýtekteriniń alǵashqy qorlary Memlekettik balansqa 1988 jyly qoıylǵan. Erkin gazdyń, kondensattyń, munaıdyń jáne erigen gazdyń alǵash geologııalyq qorlary mólsher boıynsha - 39815 mln.m3, 11623myń.t, 6493 myń.t jáne 2389 mln.m3 sáıkes, olar KSRO Qorlarynyń Memlekettik Komıtetinde (MTQ № 10526 hattamasy, 1988j.28qazan) bekitilgen.
