«QazMunaıGaz» ulttyq kompanııasy «Munaı-gaz salasyna sholý: damýdyń mańyzdy úrdisteri» degen taqyrypta semınar ótkizdi
ASTANA. 9 jeltoqsan. QazAqparat - Búgin «QazMunaıGaz» ulttyq kompanııasy (budan ári - QMG UK) BAQ-daǵy munaı-gaz taqyryby boıynsha materıaldardyń sapasyn arttyrýǵa jáne básekeles aqparattyq keńistik qalyptastyrýǵa baǵyttalǵan tanystyrý is-sharalarynyń sheńberinde Astana qalasynda «Munaı-gaz salasyna sholý: damýdyń mańyzdy úrdisteri» degen taqyrypta semınar uıymdastyrdy.
Sharaǵa jetekshi respýblıkalyq BAQ-tyń jýrnalısteri qatysty, dep habarlaıdy kompanııanyń baspasóz qyzmeti.
Semınar barysynda «Investıtsııalardyń rentabeldiligin zertteý jónindegi agenttik» JM dırektory Qaınar Qojymov qatysýshylarǵa Qazaqstan men Qytaıdyń energetıka salasyndaǵy yntymaqtastyǵynyń erekshelikteri jóninde áńgimelep berdi.
Q.Qojymovtyń aıtýyna qaraǵanda, ekonomıkanyń qarqyndap damýy, ýrbanızatsııa jáne ómir súrý deńgeıiniń ósý protsesterine baılanysty Qytaıda munaı tutyný jyldan jylǵa udaıy artyp keledi.
- Qazaqstannyń Qytaımen tyǵyz yntymaqtastyǵyna qaramastan bizdiń qorlarymyz teńizge tamǵan tamshydaı ǵana. Eger Qazaqstan úshin 2009 jyly Qytaıǵa jalpy eksport kólemi 45% quraǵan bolsa, Qytaı úshin bul (naqty alǵanda) jalpy munaı ımportynda bar bolǵany shamamen 3% bildiredi,- dedi Q.Qojymov
QMG UK Strategııalyq josparlaý departamentiniń dırektory Almaz Masalın jýrnalısterge munaı men gazdy barlaý jáne óndirý, munaı tasymaldaý, munaı óńdeý jáne satý, gaz tasymaldaý jáne marketıngi, munaı-gaz salasyna qyzmet kórsetý servısi sııaqty bes bıznes-baǵytty kózdeıtin «QazMunaıGaz»-dyń uzaq merzimdi strategııasy týraly áńgimelep berdi.
- QMG UK strategııalyq maqsaty - munaı qory men ony óńdeý deńgeıi jaǵynan 30 jetekshi elderdiń qataryna ótý. «QazMunaıGaz» óndiristik qyzmet qaýipsizdiginiń joǵary standarttaryna saı keletin, tıimdiligi joǵary jáne básekege qabiletti ıntegratsııalanǵan munaı-gaz kompanııasy retinde damıtyn bolady, - dep atap ótti A. Masalın.
Sharanyń sońynda semınarǵa qatysýshylarǵa sertıfıkattar tapsyryldy.
