"QazMunaıGaz" ulttyq kompanııasy" AQ munaı-gaz qoryna táýelsiz aýdıt júrgizýde
MATY. 6 qazan. QazAqparat /Erlik Erjanuly/ - "QazMunaıGaz" ulttyq kompanııasy" AQ-y munaı-gaz qoryna júrgizip jatqan táýelsiz aýdıttiń qorytyndy esebi 2012 jyldyń aqpan aıynda shyǵady. Ony aýdıtti júrgizip jatqan "Gaffnı Klaın end Assoshıeıtes" kompanııasynyń Ortalyq Azııadaǵy ókildiginiń basshysy Pıter Holdıng búgin Almatyda ótken baspasóz máslıhatynda aıtty.
"PRMS ádistemesi boıynsha júrgizilip jatqan bul aýdıt "QazMunaıGaz" ulttyq kompanııasynyń úlesi bar barlyq munaı-gaz kompanııalarynda júrgizilýde. Onda árbir ken orny týraly jan-jaqty aqparattar qamtylady. Bul munaıgaz qorlaryn anyqtaýdyń qazaqstandyq jiktelimin joqqa shyǵarmaıdy. Qaıta táýelsiz aýdıt retinde onyń esebi halyqaralyq ınvestıtsııa tartýǵa kómektesedi", - deıdi P. Holdıng. Onyń aıtýynsha, olar bul jumysty «QazMunaıGaz»-dyń Bas geology Qurmanǵazy Esqazıevtyń usynysy boıynsha júzege asyrýda. Ol kompanııany tıimdi basqarýǵa óz septigin tıgizip, tartymdylyǵyn arttyrmaq.
"QazMunaıGaz" ulttyq kompanııasy aýdıt júrgizý úshin ıgerý kórsetkishteriniń dınamıkasy men alǵashqy geologııalyq qorlardy kategorııalar boıynsha baǵalaýdy negizge alatyn PRMS (Munaı resýrstaryn basqarý) ádistemesin tańdap aldy. Ol ken orny qyzmet kórsetetin barlyq merzim ishinde ıgerýge qolaıly tutas qorlardyń dál sıpatyn bere alady. Búginde qazaqstandyq jikteý standarty boıynsha kompanııanyń munaı qory shamamen 800 mıllıon tonnany quraıdy. Qazirgi shoǵyrlandyrylǵan munaı óndirý deńgeıi boıynsha QazMunaıGaz 35 jyldan astam ýaqytqa dáleldengen munaı qorymen qamtamasyz etilgen", - deıdi «QazMunaıGaz»-dyń Basqarma múshesi, Barlaý jáne óndirý jónindegi basqarýshy dırektory Alık Aıdarbaev. Onyń sózine qaraǵanda, buryn «QazMunaıGaz" BÓ", "Mańǵystaýmunaıgaz" AQ-ynyń enshiles kásiporyndary ǵana ózderiniń óndirý aktıvterine aýdıt júrgizgen. Bul joly «QazMunaıGaz» kompanııalar tobynyń qorlary men resýrstarynyń barlyq óndirý aktıvterine shoǵyrlandyrylǵan baǵa berilip qoımaı, tuńǵysh ret Kaspıı teńiziniń qazaqstandyq sektorynyń jáne kompanııa aktıvteriniń basqa da resýrstyq áleýeti baǵalanady.
