«QazMunaıGaz» UK tóraǵasy Qashaǵannan munaı óndirý qashan bastalatynyn aıtty

ASTANA. QazAqparat - Qashaǵannan munaı óndirý bıylǵy jyldyń ekinshi jartysynda jandanýy múmkin. Mundaı boljamdy búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «QazMunaıGaz» UK» AQ basqarma tóraǵasy Saýat Myńbaev aıtty.

«Jyldyń ekinshi jartysynda munaı óndirý jandanýy múmkin. Degenmen, biz ony áli de bolsa naqty aıta almaımyz. Al munaıdyń qandaı kólemde óndiriletindigi týraly aıtý tipten erte. Naýryzda kelisimshartqa qol qoıylǵan soń jáne gaz qubyryn aýystyrý boıynsha ınvestıtsııalyq sheshimdi qabyldaǵannan keıin ǵana óndirý kólemi men shyǵyndar belgili bolady», - dep atap ótti S. Myńbaev.