«QazMunaıGaz» UK AQ-sy Almatydaǵy №131 orta mektep-lıtseıine jańa kópfýnktsıonaldy sport alańyn salyp berdi

Atalǵan kompanııanyń barlaý jáne óndirý jónindegi basqarýshy dırektory Alık Aıdarbaevtyń aıtýynsha, bul is QR Prezıdentiniń Qazaqstanda buqaralyq sportty damytý bastamasyn oryndaý maqsatynda júzege asqan. «Bizdiń kompanııa 2 jyl ishinde osyndaı sport alańdaryn respýblıka boıynsha 50 mektepke, onyń ishinde 5-ýin Almatydaǵy bilim berý oshaqtarynda ashpaq. Jastarymyz sportpen aınalysyp, sabaqtaryn jaqsy oqıdy degen senimdemiz», -dep atap ótti A.Aıdarbaev.

Sońǵy zamanaýı úlgide salynǵan sport alańynda fýtbol, voleıbol, tennıs taǵy basqa sport túrlerimen aınalysýǵa bolady. Sonymen qatar qysta alańnyń zaqym keltirmeıtin aıazǵa tózimdi jabyny balalardyń sportpen aınalasýy úshin barynsha jaıly jáne qaýipsiz.

«Buqaralyq balalar sportyn damytýǵa qosqan úlesi úshin «QazMunaıGaz» ulttyq kompanııasyna tereń alǵysymdy bildiremin. Balalar ózderiniń sporttyq sheberlikterin jetildirýge úlken múmkindik aldy», -deıdi mektep dırektory Kúlebaı Úmeshbaev.

Sport alańynyń ashylý rásimine qala ákimi Ahmetjan Esimov, QR fýtbol Federatsııasynyń vıtse-prezıdenti Seıilda Baıshaqov, ustazdar men mektep oqýshylary qatysty.