«QazMunaıGaz» UK AQ-da Qytaı kásiporyndarynyń úlesi 2020 jylǵa deıin azaıady - Bolat Palymbetov
ALMATY. 6 mamyr. QazAqparat /Erbol Azanbek/ - «QazMunaıGaz» UK AQ-daǵy Qytaı kásiporyndarynyń úlesi 2020 jylǵa deıin azaıady. Bul týraly búgin Almatyda qazaq tildi BAQ ókilderimen kezdesken kompanııa basshylary málim etti.
«QazMunaıGaz» UK AQ basqarma tóraǵasynyń orynbasary Bolat Palymbetovtyń aıtýynsha, QazMunaıGazdaǵy Qytaı kompanııalarynyń úlesi 2010 jyly 15,4 paıyzdy qurady. «Ulttyq kompanııanyń 2020 jylǵa deıingi strategııalyq jospary boıynsha 2015 jylǵa qaraı bul úles 11 paıyzdy quraıdy, al 2020 jylǵa qaraı 5 paıyzǵa deıin azaıady», - dedi B.Palymbetov.
«QazMunaıGaz» UK AQ ıgerý jáne óndirý tehnologııasy departamentiniń dırektory Nurlybaı Qııalbaevtyń aıtýynsha, QMG UK úlesi bar 11 munaı óndirýshi kásiporynnyń ishinde qytaılyq kompanııalar 5 birlesken kásiporynǵa áriptes bolyp tabylady. Olar: «PetroQazaqstan QumkólResorsız» AQ (67% CNPC), - «Torǵaı Petroleým» JShS (33,5% CNPC), - «QazGerMunaı» BK JShS (33,5% CNPC), - «Qarajambasmunaı» AQ (50% CITIC), - «Mańǵystaýmunaıgaz» AQ (50% CNPC) kompanııalary. Bul rette QHR azamattarynyń osy óndirýshi kompanııalardaǵy sany orta eseppen 1-3%-dy quraıdy.
«Alaıda dál qazir qytaılyq kásiporyndar úlesi nege kóp degen másele bolmaýy kerek. Óıtkeni biz ınvestorlardy tańdaǵanda qoıatyn basty talabymyz olardyń qaı elden ekendigi emes, ol Qytaı ma, Reseı me, AQSh pa, joq basqa ma? Sebebi kez kelgen jaǵdaıda Qazaqstan múddesi - lıtsenzııalaý mehanızmi, salyq salý júıesi, QR Munaı jáne gaz mınıstrligi, basqa da beıindi memlekettik organdardyń tarapynan baqylaý júıesi, jer qoınaýyn paıdalaný týraly kelisimsharttardaǵy mindettemeler arqyly qorǵalady», - dep atap kórsetti N.Qııalbaev.
Kezdesý barysynda sheteldik, onyń ishinde Qytaı kompanııalarynyń úlesimen qatar, qazaq tildi BAQ-men yntymaqtastyqty arttyrý máselesi de sóz boldy. Atap aıtqanda BAQ-da qazaq tilinde shyǵatyn materıaldardyń sapasyn arttyryp, ózektendirýge baǵyttalǵan osyndaı sharalardy ótkizip turý, sonymen birge kásiptik qazaq tildi jýrnalıstıkany damytý qajettigi de aıtyldy. Ekijaqty kezdesýge «QazMunaıGaz» UK AQ basqarma tóraǵasynyń orynbasary Bolat Palymbetov bastaǵan QMG menedjerleri men respýblıkalyq memlekettik tilde shyǵatyn jetekshi BAQ ókilderi, tele jáne radıojýrnalıster, sarapshylar qatysty. «Bul - QMG UK qazaq tildi BAQ bas redaktorlary jáne jýrnalısterimen ótkizip otyrǵan dástúrli kezdesýi. Búgin biz sizdermen munaı-gaz salasyndaǵy úrdisterdi talqylap, jýrnalısterdi tolǵandyryp júrgen, sonymen birge qytaılyq áriptestermen júrgizilip jatqan birlesken jobalardyń júzege asyrylýy jaıyndaǵy suraqtarǵa jaýap beremiz»,- dedi Bolat Palymbetov. Ol sondaı-aq «QazMunaıGaz» Ulttyq kompanııasynyń memlekettik tilde shyǵatyn BAQ-men yntymaqtastyqqa basa nazar aýdaratynyn atap kórsetti.
