«QazMunaıgaz» UK AQ Astanada kóp maqsatty onynshy sport alańyn ashty
ASTANA. Qyrkúıektiń 1-i. QazAqparat - «QazMunaıGaz» UK AQ búgin Astana qalasyndaǵy №14 mektep-gımnazııasynyń aýmaǵynda kóp maqsatty onynshy sport alańyn ashty, dep habarlady kompanııanyń baspasóz qyzmeti.
Joba «QazMunaıGaz» UK AQ alǵa qoıǵan 50 úlgi jobadaǵy kóp maqsatty sport alańyn salý baǵdarlamasyn, sondaı-aq QR Prezıdenti N. Nazarbaevtyń Qazaqstanda buqaralyq sportty damytý bastamasyn iske asyrý aıasynda salyndy. Bul baǵdarlama sporttyń buqaralyq túrlerimen aınalysýǵa jaǵdaı jasaýǵa jáne salamatty ómir saltyn nasıhattaýǵa, balalar men jetkinshekterdi barynsha sportqa tartýǵa baǵyttalǵan.
Kóp maqsatty sport alańyn ashý rásimine «QazMunaıGaz» UK AQ bıznesti qoldaý jónindegi bas menedjeri Serikbek Elshibekov, mekteptiń ustazdary men oqýshylary jáne ata-analar qatysty.
- Búgin biz, «QazMunaıgaz» kompanııasy barshaǵa, ıaǵnı osy mekteptiń oqýshylarymen qatar osy mańda turatyn balalarǵa da arnalǵan sport alańyn ashyp otyrmyz, - dep atap kórsetti óz sózinde Serikbek Elshibekov. - Biz múmkindiginshe osynaý zamanaýı ári tamasha jabdyqtalǵan sport alańynda balalardyń sporttyń ózderi unatqan túrlerimen kóbirek aınalysqanyn qalaımyz, - dedi ol.
«QazMunaıgaz» Ulttyq kompanııasyna buqaralyq balalar sportyn damytýǵa qosqan mol úlesi úshin tereń alǵysymdy bildiremin, - dep atap kórsetti mektep dırektory Oleg Nadeın. - Bizdiń mektepte basketbol, jeńil atletıka, qol kúresi, karate, dzıýdo syndy sport sektsııalary jumys isteıdi, al QMG syılaǵan sport alańynyń ashylýy endi tennıs, voleıbol, shaǵyn fýtbol jáne hokkeı sııaqty sport túrlerin damytýǵa múmkindik beredi.
№14 mektep-gımnazııasynyń oqýshylary elimizdegi jáne halyqaralyq jarystarda jeńiske jetip júrgen basketboldan QR áıelder komandasynyń múshesi ekendigin atap ótken jón.
Qurylystyń zamanaýı tehnologııasynyń arqasynda sport alańynda shaǵyn fýtbolmen, voleıbolmen, basketbolmen jáne tennıspen, basqa da sport túrlerimen aınalysýǵa bolady. Qysta alańnyń jaraqattanýdy boldyrmaıtyn, sýyqqa tózimdi jabyny balalar sporty úshin meılinshe yńǵaıly ári qaýipsiz, ol qaıtalap muzdata-jylytyp otyrýǵa múmkindik beredi, sol sebepti bul elordanyń aýa raıy jaǵdaıynda óte qolaıly.
Sportpen keshki mezgilde shuǵyldaný úshin sport alańyna qosymsha jaryq berý dińgekteri ornatylǵan. Sport alańyn salý kezinde QR barlyq ekologııalyq, sanıtarlyq-gıgıenalyq, órtke qarsy jáne basqa da normalary men erejeleri qatań saqtalǵan.
«QazMunaıGaz» UK AQ qurylys baǵdarlamasyn iske asyrý aıasynda oqý jylynyń bastalýyna oraı taǵy da osyndaı on zamanaýı sport alańy ashyldy, al búkil Qazaqstan boıynsha osyndaı 50 nysan salynatyn bolady.
Kóp maqsatty sport alańdaryn salý baǵdarlamasy 2010 - 2011 jyldarǵa eseptelgen.
