QazMunaıGaz, SINOOIL, Gelıos pen Gazpromneft sapasyz benzın satyp kelgen

ASTANA. QazAqparat - Qazaqstan Respýblıkasy Ulttyq ekonomıka mınıstrliginiń Tutynýshylardyń quqyqtaryn qorǵaý komıteti sapasyz benzın satyp kelgen janar-jaǵarmaı stansalarynyń tizimin jarııalady. Onda elimizde keńinen taraǵan QMG, SINOOIL, Gelıos pen Gazpromneft stansalary da bar.

Qazaqstan Respýblıkasy Ulttyq ekonomıka mınıstrliginiń Tutynýshylardyń quqyqtaryn qorǵaý komıteti elimizdiń avtomobılge janarmaı quıý stantsııalarynda ótkiziletin avtomobıl benzıniniń sapasyna monıtorıng júrgizý kezinde TR KO 013/2011 Keden odaǵynyń tehnıkalyq reglamentiniń talaptaryna 27%-nyń sáıkes kelmeıtini anyqtady.

Zerteýler nátıjeleri boıynsha JQS-ta myna óndirýshilerdiń sapasyz benzın ótkizilgeni belgili boldy:

1) oktandyq sany boıynsha: «Pavlodarskıı NHZ» JShS-nyń - 13 synamasynda, «Atyraý MÓZ» JShS-nyń - 8 synamasynda, «Petro Kazahstan Oıl Prodakts» JShS-nyń - 7 synamasynda, «Gazprom-Omskıı NPZ» AQ-nyń - 5 synamasynda;
2) quramyndaǵy kúkirt boıynsha: «Gazprom-Omskıı NPZ» AQ-nyń - 7 synamasynda, «Bashneft»AAQ-nyń - 4 synamasynda, «TAIF-NK» AAQ, «Orsknefteorgsıntez»AAQ, «Gazprom neftehım - Salavat» AQ- bir synamadan;
3) benzoldyń kólemdik úlesi boıynsha: «Bashneft» AAQ-nyń - 3 synamasynda, «Atyraý MÓZ» JShS-nyń - 2 synamasynda, «TAIF-NK» AAQ-nyń - 2 synamasynda jáne «Gazprom-Omskıı NPZ» AQ, «Orsknefteorgsıntez» AAQ - bir synamadan;
4) hosh ıisti kómirteginiń kólemdik úlesi boıynsha: «Orsknefteorgsıntez» AAQ-nyń - 4 synamasynda, «TAIF-NK» AAQ - 2 synamasynda jáne «Atyraý MÓZ» JShS-nyń - bir synamasynda.

«JQS-taǵy benzınniń sáıkes kelmeý faktorlarynyń biri barlyq markadaǵy joǵary oktandy benzındi tómen oktandy benzınmen aralastyratyn satýshynyń qasaqana is-áreketteri bolyp tabylýy múmkin. Sáıkes kelmeıtin benzın satylǵan JQS-tyń tizbesi ákimshilik is-sharalar aıaqtalǵannan keıin qosymsha beriletin bolady», - delingen habarlamada.