«QazMunaıGaz» sheteldik kompanııalarmen, sondaı-aq qytaılyq áriptestermen birlesken jobalardy damytý máselelerine arnalǵan «dóńgelek ústel» ótkizdi
ASTANA. 6 mamyr. QazAqparat - Búgin Almaty qalasynda «QazMunaıGaz» UK AQ (budan ári - QMG UK) sheteldik kompanııalarmen, sondaı-aq qytaılyq áriptestermen birlesken jobalardy damytý máselelerine arnalǵan «dóńgelek ústel» ótkizdi,
dep habarlady kompanııanyń baspasóz qyzmeti.
Sharaǵa basqarýshy dırektor - «QazMunaıGaz» UK AQ Basqarma tóraǵasynyń orynbasary Bolat Palymbetov, respýblıkalyq memlekettik tilde shyǵatyn BAQ ókilderi, tele jáne radıojýrnalıster, sarapshylar qatysty.
«Dóńgelek ústeldi» asha kele Bolat Palymbetov «QazMunaıGaz» Ulttyq kompanııasynyń memlekettik tilde shyǵatyn BAQ-men yntymaqtastyqqa basa nazar aýdaratynyn atap kórsetti.
- Bul - QMG UK qazaq tildi BAQ bas redaktorlary jáne jýrnalısterimen ótkizip otyrǵan dástúrli kezdesýi. Búgin biz sizdermen munaı-gaz salasyndaǵy úrdisterdi talqylap, jýrnalısterdi tolǵandyryp júrgen, sonymen birge qytaılyq áriptestermen júrgizilip jatqan birlesken jobalardyń júzege asyrylýy jaıyndaǵy suraqtarǵa jaýap beremiz,- dedi Bolat Palymbetov.
2010 jyldyń qorytyndysy boıynsha QMG UK qatysatyn Qytaı kásiporyndarynyń úlesi 15,4% qurady. «QazMunaıGaz» UK 2020 jylǵa deıingi strategııalyq jospary boıynsha 2015 jylǵa qaraı bul úles 11% quraıdy, al 2020 jylǵa qaraı 5% deıin azaıady.
«Dóńgelek ústel» aıasynda «QazMunaıGaz» UK AQ ıgerý jáne óndirý tehnologııasy departamentiniń dırektory Nurlybaı Qııalbaev jalpy QMG UK úlestik qatysýymen 11 munaı óndirýshi kásiporynnyń ishinde qytaılyq kompanııalar 5 birlesken kásiporynda áriptes bolyp tabylatyndyǵyn atap ótti. Olar: «PetroQazaqstan QumkólResorsız» AQ (67% CNPC), - «Torǵaı Petroleým» JShS (33,5% CNPC), - «QazGerMunaı» BK JShS (33,5% CNPC), - «Qarajanbasmunaı» AQ (50% CITIC), - «Manǵystaýmunaıgaz» AQ (50% CNPC) kompanııalary. Bul rette QHR azamattarynyń osy óndirýshi kompanııalardaǵy sany orta eseppen 1-3% quraıdy.
- Biz ınvestorlardy tańdaǵanda qoıatyn basty talabymyz olardyń qaı elden ekendigi emes, ol Qytaı ma, Reseı me, AQSh pa, joq basqa ma? Sebebi kez kelgen jaǵdaıda Qazaqstan múddesi - lıtsenzııalaý mehanızmi, salyq salý júıesi, QR Munaı jáne gaz mınıstrligi, basqa da beıindi memlekettik organdardyń tarapynan baqylaý júıesi, jer qoınaýyn paıdalaný týraly kelisimsharttardaǵy mindettemeler arqyly qorǵalady, - dep atap kórsetti N.Qııalbaev.
Qoryta kelgende, «dóńgelek ústelge» qatysýshylar BAQ qazaq tilinde shyǵatyn materıaldardyń sapasyn arttyryp, ózektendirýge baǵyttalǵan osyndaı sharalardyń ótkizilip turýyn qoldaı otyryp, sonymen birge básekelestik aqparat aıdynyn arttyrý arqyly kásiptik qazaq tildi jýrnalıstıkany damytý qajettigin atap kórsetti.
