QazMunaıGaz Prezıdenttiń aǵash otyrǵyzý bastamasyn qoldady
14 qazanda «QazMunaıGaz» ulttyq kompanııasynyń 300-ge jýyq qyzmetkeri elordada kóshet otyrǵyzý boıynsha korporatıvtik ekologııalyq aktsııasyn ótkizdi. Olar Memleket basshysy Qasym-Jomart Toqaevtyń bes jyl ishinde 2 mlrd aǵash otyrǵyzý bastamasyna qoldaý kórsetti, dep habarlaıdy Kazinform.
Ekoaktsııaǵa QMG basqarma tóraǵasy Maǵzum Myrzaǵalıev, Astana qalasynyń ákimi Jeńis Qasymbek jáne QR Ekologııa jáne tabıǵı resýrstar vıtse-mınıstri Nurken Shárbıev qatysty.
Іs-shara maqsaty — ekologııalyq jaýapkershilik pen qorshaǵan ortaǵa qamqorlyq ıdeıalaryn dáripteý, sondaı-aq qalany jasyl jelekke aınaldyrý.
«QazMunaıGazdyń ekologııalyq jobalary kompanııa kásiporyndary ornalasqan barlyq óńirde iske asyp keledi. Atalǵan bastamaǵa qoldaý kórsetken qyzmetkerlerge, QMG eriktilerine alǵys bildiremin. Kúsh-jigerimizdi biriktire otyryp, uzaq merzimdi ári turaqty maqsattarǵa qol jetkize alamyz», — dedi M.Myrzaǵalıev.
Astana ákimi Jeńis Qasymbek bıyl qalany kógaldandyrý men abattandyrý boıynsha aýqymdy jumys júrgizilip jatqanyn atap ótti.
«Aldymyzda elordany barynsha jasyl qalaǵa aınaldyrý mindeti tur. Memlekettik organdar men ulttyq kompanııalardan basqa, aǵash otyrǵyzýǵa elorda turǵyndary, bıznes ókilderi, múlik ıeleriniń birlestigi (turǵyn úı keshenin basqarýshy kompanııalar) jáne erikti jandar atsalysyp jatqany qýantady. Sondaı-aq, biz qurylys salýshylarǵa turǵyn úılerdi tapsyrý kezinde irgeles aýmaqtardy kógaldandyrý máselesine jiti nazar aýdardy tapsyrdyq. Osylaısha, birinshi kezekte qurylys kompanııalary 100 myńǵa deıin jasyl jelek otyrǵyzady», — dedi Jeńis Qasymbek.
Astanadaǵy Saýran kóshesiniń boıyna jáne Túrkistan kóshesinde ornalasqan Álıhan Bókeıhan atyndaǵy № 76 mektep-lıtseıiniń aýmaǵyna jóke, qaıyń, sibir jáne eýropa shyrshasy, qaraǵaı aǵashynyń kóshetteri otyrǵyzyldy. Jyldar óte bul kóshetter elordanyń kórkine aınalady.
QMG bolashaqta bul ıgi bastamany dástúrge aınaldyrýǵa nıetti.
Jalpy, korporatıvtik mádenıetti qoldaý jáne volonterlikti damytý maqsatynda qurylǵan QMG kompanııalar tobynyń eriktiler qozǵalysy túrli áleýmettik bastamalarda belsendilik tanytyp keledi.
