«QazMunaıGaz» ózine tıesili «Evro-Azııa Eır» áýetasymaldaýshy kompanııasyn satylymǵa shyǵarmaq

ASTANA. QazAqparat - 2016-2020 jyldarǵa arnalǵan jekeshelendirýdiń Keshendi jospary aıasynda «QazMunaıGaz» UK AQ Jekeshelendirý baǵdarlamasynyń birinshi tizimindegi eń iri nysannyń biri - «Avıakompanııa Evro-Azııa Eır» AQ 100 paıyz aktsııalar paketin satý jóninde ekikezeńdik ashyq konkýrs ótkizý týraly habarlamasyn jarııalady.

«EAE-ni jekeshelendirý «Samuryq-Qazyna» ulttyq ál-aýqat qory» aktsıonerlik qoǵamynyń aktıvterdi qaıta qurylymdaýyna jáne daýys beretin aktsııalarynyń keminde elý protsenti Qorǵa menshik nemese senimgerlik basqarý quqyǵynda tikeleı nemese janama tıesili uıymdardyń aktıvter men nysandardy satýynyń biryńǵaı qaǵıdasyna sáıkes júzege asyrylady.

Táýelsiz baǵalaýshy baǵalaý júrgizip, EAE-nyń 100 paıyz aktsııasynyń naryqtyq quny 15 mlrd. 599 mln. 339 myń teńgeni qurady», - delingen QMG taratqan habarlamada.

EAE-ny satý sharttarynyń aıasynda áleýetti satyp alýshy 5 jyl ishinde jekeshelendirý nysanynyń beıindi qyzmetin saqtaýǵa, personaldyń aǵymdaǵy shtattyq sanyn kemitpeýge jáne EAE men onyń qyzmetkerleriniń arasynda jasalǵan eńbek kelisimshartynda kórsetilgen is júzindegi sharttardy, onyń ishinde aǵymdaǵy eńbekaqy deńgeıin tómendetpeýge mindettenedi.

EAE-ny satý sharttary jónindegi barynsha egjeı-tegjeıli aqparat QMG saıtynda ornalastyrylǵan.

Jekeshelendir nysanyn áleýetti satyp alýshylardan kelip túsken ótinish berilgen konvertterdi ashý habarlama jarııalanǵan 30 kúntizbelik kúnnen keıin, 2016 jyldyń 19 tamyzynda Astana ýaqyty boıynsha 11:00-de buqaralyq aqparat quraldary ókilderiniń qatysýymen ótedi dep kútilýde.

EAE - QMG-niń 100% enshiles kompanııasy. Onyń qyzmetiniń negizgi túrleri bolyp zańdy jáne jeke tulǵalarǵa avıatasymaldaý jónindegi qyzmetter kórsetý, paıdaly qazbalar kenishterin damytý jáne ıgerý jónindegi ushýlardy oryndaý, munaı jáne gaz qubyrlaryna, elektr júıelerine qyzmet kórsetý bolyp tabylady.