«QazMunaıGaz» «Ózenmunaıgaz» kompanııasynda qalyptasqan jaǵdaıdy túsindirdi

ASTANA. KAZINFORM - QazMunaıGaz Jańaózendegi jaǵdaıdy jiti baqylap otyr jáne budan buryn «Ózenmunaıgaz» kompanııasyna qarasty Burǵylaý jumystary basqarmasy jumysshylarynyń ár talaby boıynsha naqty túsinikteme bergen bolatyn.

«Birinshi kúnderi ruqsatsyz aktsııaǵa 1 700 adam qatysqan. Biraq túsindirý is-sharalarynan keıin jumysshylardyń basym bóligi jumys oryndaryna oraldy. Búginde 281 jumysshy jalǵan aqparatqa negizdelgen talap qoıyp, jumysqa shyǵýdan bas tartyp otyr. 2021 jyldan bastap jáne bıylǵy 10 aıdyń qorytyndysy boıynsha Ózenmunaıgazǵa 1978 adam jumysqa qabyldanyp, sonyń 199-y Burǵylaý jumystary basqarmasyna ornalasty», - delingen habarlamada.

Sondaı-aq onda kompanııada jaqsy jaǵdaı jasalǵany, bir qyzmetkerge kórsetiletin áleýmettik qoldaý mólsheri — eń joǵary kórsetkishterdiń biri ekeni aıtylǵan.

Ózenmunaıgazdyń qazirgi ujymdyq sharty bıyl 25 sáýirde ÓMG men úsh kásipodaq arasynda qabyldanyp, áleýmettik qoldaý somasy taǵy shamamen 9 mlrd teńgege ulǵaıtyldy. Sonymen qatar ÓMG jumysshylarynyń jalaqysyna jyl saıyn ındeksatsııa júrgiziledi. 2022 jyly qyzmetkerlerdiń jalaqysy 30%-ǵa, 2023 jyly 9,5%-ǵa, bıyl 8%-ǵa kóterildi.

Ujymdyq shartta áleýmettik qoldaýdyń 40-tan astam túri kózdelgen: memlekettik, ulttyq jáne kásibı merekelerge arnalǵan syıaqy, baspana satyp alý men keńeıtýge jeńildikpen nesıe berý, medıtsınalyq qyzmet kórsetý, jyl saıyn shıpajaılarǵa 2500 joldama bólinedi, ÓMG qyzmetkerleriniń shamamen 4500 balasy balalar-saýyqtyrý lagerine jiberiledi, aı saıyn balabaqsha aqysy óteledi, qyzmetkerler balalarynyń oqý úlgerimine qaraı joǵary oqý oryndarynda oqytý úshin qarajat kózdelgen. Sondaı-aq neke qııý kezinde jáne basqa da jeńildikter qarastyrylǵan.

Aıta ketsek, búginde Ózenmunaıgaz óndirý josparynan qalyp kele jatyr. Josparly kórsetkishterdiń oryndalmaýy kompanııanyń qarjylyq jaǵdaıyna áser etetin bolady. Osyǵan baılanysty, burǵylaý jumystary basqarmasynyń mamandaryn jumysqa shyǵýǵa shaqyramyz. Sondaı-aq, el zańdaryn saqtaý qajet ekenin eske salamyz.

«Talap qoıylǵan kúnnen bastap burǵylaý jumystary basqarmasynyń jumysshylarymen Ózenmunaıgaz basshylyǵy kelissóz júrgizip jatyr», - dep naqtylady «QazMunaıGaz» ókilderi.

Osyǵan deıin «QazMunaıGaz» «Ózenmunaıgaz» kompanııasy jumyskerleri kásipodaǵynyń talaptaryna jaýap bergen edi.